Mumbai Crime: राष्ट्रवादी काँग्रेस अजित पवार गटाच्या तालुकाध्यक्षावर हल्ला करण्यात आला आहे. यात तालुकाध्यक्ष सचिन कुर्मी यांचा मृत्यू झाला आहे. भायखळा परिसरातील म्हाडा कॉलनीच्या मागे त्यांच्यावर धारदार शस्त्राने हल्ला झाला होता. यात त्यांचा मृत्यू झाला आहे.

पोलिसांनी दिलेल्या माहितीनुसार, रात्री साडेबारा वाजताच्या दरम्यानची ही घटना आहे. पोलिसांना घटनेची माहिती मिळताच ते घटनास्थळी पोहोचले होते. यावेळी सचिन कुर्मी हे जखमी अवस्थेमध्ये पडले होते. त्यानंतर त्यांना पोलिसांच्या गाडीतूनच जेजे हॉस्पिटलमध्ये दाखल करण्यात आले होते. या ठिकाणी डॉक्टरांनी कुर्मी यांना मृत घोषित केलं. त्यांचे पोस्टमार्टम केले जात आहे.

सचिन कुर्मी यांच्यावर कोणी आणि कशासाठी हल्ला केला हे अद्याप समजू शकलेलं नाही. पण, आपापसातील वादातून ही हत्या झाल्याची प्राथमित माहिती आहे. पोलीस याप्रकरणी अधिक तपास करत आहेत. सदर घटनेमुळे एकच खळबळ उडाली आहे. शिवाय, या हत्येमुळे त्यांचे समर्थक आक्रमक झाले आहेत. आरोपींना तात्काळ पकडण्याची मागणी होत आहे. याप्रकरणी पुणे काय कारवाई होते हे पाहावं लागेल. अद्याप याप्रकरणी कोणतीही अटक झालेली नाही.