मुंबई - मुंबई पोलिसांच्या आर्थिक गुन्हे शाखेने गुप्तहेर संस्थेचा गुप्तहेर म्हणुन भासवूनआर्थिक फसवणूक करणाऱ्या सराईताला अटक केली आहे. आदित्य अशोक जोगानी उर्फ अजय दवे असे 44 वर्षीय आरोपीचे नाव असून तो मलबार हिलचा रहिवासी आहे.

आरोपीने सांताक्रूझ येथील एका व्यावसायिकाची सुमारे 4 कोटी रुपयांची फसवणूक केल्याचा आरोप आहे. आरोपीने केंद्रीय गुप्तचर संस्थेचा गुप्तहेर एजंट म्हणून ओळख सांगून दिल्लीतील भाजपच्या वरिष्ठ नेत्यांशी जवळचे संबंध असल्याचा दावा करून व्यावसायिकाची फसवणूक केली.

2018 ते 2022 या दरम्यान आरोपीदवेने तक्रारदार व्यावसायिकाकडून त्याच्या कथित राजकीय प्रभावाचा वापर निविदा मंजूर करणे, महाविद्यालय किंवा शाळेत प्रवेश देणे इत्यादी कामे करून देण्याचे आश्वासन दिले. या बदल्यात आरोपीने फसवणूक करून व्यावसायिकाकडून पैसे घेतले.

परंतु व्यावसायिकाचे कोणतेही काम कधीच पूर्ण झाले नाही तसेच आरोपीने घेतलेले पैसे देखील परत केले नाहीत. अनेक महिन्यांपासून दवेकडे पाठपुरावा करून पैसे परत मिळवण्याचा प्रयत्न अयशस्वी झाल्यानंतर, तक्रारदाराने शेवटी पोलिसांशी संपर्क साधला.

सांताक्रूझ पोलिस ठाण्यात गुन्हा दाखल झाल्यानंतर, मुंबई पोलीसांच्या आर्थिक गुन्हे शाखेकडे तपास वर्ग करण्यात आला. वरिष्ठ अधिकाऱ्यांच्या मार्गदर्शनात पथकाने बुधवारी आरोपी अजय दवेला बीकेसी येथून अटक केली.