डोंबिवली - डोंबिवलीतील 60 वर्षीय ज्येष्ठ नागरिकाची कल्याण मधील दांम्पत्याने वाढीव व्याजाचे आमिष दाखवून 77 लाख 73 हजाराला फसवणूक केल्याची घटना उघडकीस आली आहे. शांताराम निलख असे फसवणूक झालेल्या ज्येष्ठ नागरिकाचे नाव असून याप्रकरणी रामनगर पोलिस ठाण्यात तक्रार दाखल करण्यात आली आहे.

दाखल तक्रारीनुसार पूजा भोईर (वय 33) आणि विशांत भोईर (वय 35) यांच्या विरोधात गुन्हा दाखल करण्यात आला आहे. डोंबिवली पूर्वेतील शिवमंदिर परिसरात शांताराम हे राहण्यास आहेत. ते सेवानिवृत्त आहे. कल्याण मधील खडकपाडा परिसरात राहणारे पूजा आणि विशाल या पती पत्नीने शांताराम यांचा विश्वास संपादन केला.

त्यांना वाढीव व्याजाचे आमिष त्यांनी दाखविले. दर आठवड्याला व्याज मिळेल असेही सांगितले. यातून शांताराम यांनी 77 लाख 73 हजार रुपये भोईर दाम्पत्याच्या बोलण्यावर विश्वास ठेवून त्यांच्या हाती दिले. दर आठवड्याला मोठी रक्कम हातात पडणार असल्याने शांताराम यांनी गुंतवणूक केली.

मात्र त्यांच्या हाती पैसे पडले नाही. गुंतवलेली रक्कम देण्यात भोईर हे टाळाटाळ करु लागले. सतत तगादा लावूनही भोईर दाम्पत्य वाढीव व्याज नाहीच पण मूळ रक्कमही परत करत नसल्याने आपली फसवणूक त्यांनी केली असल्याची खात्री शांताराम यांची झाली. त्यांनी रामनगर पोलीस ठाण्यात याप्रकरणी गुन्हा दाखल केला आहे.