मुंबई : अल्पवयीन मुलीची अश्लील चित्रफीत नातेवाईकाला पाठवणाऱ्या तरूणाविरोधात गुन्हा दाखल करण्यात आला आहे. ही घटना कुर्ल्यातील असून याप्रकरणी कुर्ला येथील विनोबा भावे मार्ग पोलिसांनी 18 वर्षीय तरूणाविरोधात सोमवारी विनयभंग, बदनामीसह माहिती तंत्रज्ञान प्रतिबंधक कायद्याअंतर्गत गुन्हा दाखल केला आहे.

सोशल मीडियाद्वारे पीडित मुलगी अल्पवयीन तरुणाच्या संपर्कात आले. काही काळाने आरोपी तरुण आणि मुलगी यांच्यात जवळीक निर्माण झाली. त्याचाच फायदा उचलत तरूणाने अल्पवयीन मुलीचे अश्लील चित्रीकरण केले. पीडित मुलीशी काही वाद झाल्यानंतर आरोपी तरुणाने तिच्या नातेवाईकाला ते व्हिडीओ पाठवले.

याप्रकरणी पीडित मुलीच्या आईने पोलिसांकडे तक्रार केली आहे. तक्रारीनुसार, आरोपीने इन्स्टाग्राम, व्हॉट्स ॲपद्वारे पीडित मुलीशी संपर्क साधून प्रेम करत असल्याचे भासवले. त्यानंतर स्वतःच्या जीवाचे बरेवाईट करण्याची धमकी देऊन तिचे चित्रीकरण केले. तसेच छायाचित्रही काढले.

त्याद्वारे आरोपी पीडित मुलीकडे शारिरीक संबंधांची मागणी करत होता. त्याला नकार दिला असता आरोपीने पीडित मुलीची चित्रफित नातेवाईक मुलीला पाठवून तिची बदनामी केली. याप्रकरणी पोलिसांनी गुन्हा दाखल केला असून पोलीस अधिक तपास करीत आहेत