डोंबिवली - रस्त्याने चालत जात असतानाच गुंड टेडीने आपल्याच मित्राला चहाचे पैसे देण्याची मागणी केली. त्यावेळी मित्रानं कामावर जाण्यास उशीर होत असून माझ्याकडे पैसे नाहीत असे सांगितले. तेव्हा संतापलेल्या टेडीने भर रस्त्यात मित्रावर चाकूने सपासप वार करत त्याला गंभीर जखमी केले. ही घटना कल्याण मध्ये घडली आहे.

याप्रकरणी कोळसेवाडी पोलीस ठाण्यात तक्रार दाखल करण्यात आली आहे. संजय अनिल मखवाना उर्फ टेडी (वय 22) असे हल्लेखोराचे नाव आहे. तर विशाल प्रभाकर पाटोळे (वय 22) असे चाकू हल्ल्यात गंभीर जखमी झालेल्या साथीदाराचे नाव आहे.

तक्रारदार विशाल हा कल्याण पूर्वेतील खडेगोळवली परिसरातील आत्माराम नगरमध्ये कुटुंबासह राहतो. तर हल्लेखोर टेडी हा कल्याण पूर्वेतील आनंदवाडी येथे राहत असून तो कल्याण पूर्वेत गावगुंड म्हणून ओळखला जातो. विशेष म्हणजे, तक्रारदार विशाल आणि हल्लेखोर टेडी या दोघांनी यापूर्वी चोरीचे गुन्हे सोबत केल्याने त्यांची आधीपासूनच ओळख असल्याचे पोलीस तपासात समोर आले आहे.

विशाल हा रविवारी सकाळी कामावर जाण्यासाठी निघाला होता. त्यावेळी तो कल्याण पूर्वेतील पुणे लिंक रोडवरून पायी जात असतानाच हल्लेखोर टेडीने विशालकडे चहा पिण्यासाठी पैश्याची मागणी केली मात्र विशाल म्हणाला की, माझ्याकडे पैसे नसल्याने मी देऊ शकत नाही. आधीच मला कामावर जाण्यास उशीर झाल्याने पैश्याची मागणी करणाऱ्या हल्लेखोराला बोलताच त्याने विशालला शिवीगाळ करत मारहाण करण्यात सुरुवात केली.

त्यामुळे विशालही त्याला मारहाण करत असल्याचे पाहून हल्लेखोर टेडीने अचानक खिश्यातून धारदार चाकू काढून विशालवर भर रस्त्यातच सपासप वार करून घटनास्थळावरून पळून गेला. विशाल गंभीर जखमी झाल्याने त्याला उपचारासाठी नजीकच्या रुग्णालयात दाखल करण्यात आले होते.

या घटनेची माहिती पोलिसांना मिळताच त्यांनी जखमी विशालचा जबाब घेऊन त्याच्या तक्रारीवरून हल्लेखोर संजय उर्फ टेडी याच्यावर विविध कलमांनुसार गुन्हा दाखल केला. घटनेपासून हल्लेखोर संजय उर्फ टेडी हा फरार असून पोलीस त्याचा शोध घेत असल्याची माहिती पोलीसांकडून देण्यात आली आहे.