डोंबिवली - कुत्तो को ऐसे मत छोडो, काट ने का डर रहता है...असे म्हणताच एका श्वान मालकाने ज्येष्ठ नागरिकावर चाकूने वार केल्याची घटना डोंबिवलीत घडली आहे.

डोंबिवली जवळील खोणी गावातील लेक शोअर पलावा वसाहतीमध्ये मंगळवारी सकाळी ही घटना घडली असून यामध्ये अशोक कुमार ठठू (वय 70) हे जखमी झाले आहेत. याप्रकरणी मानपाडा पोलीस ठाण्यात शेजाऱ्या विरोधात गुन्हा दाखल करण्यात आला आहे.

खोणी गावातील लेक शोअर पलावा सिटी मध्ये लेकसाइड सोसायटीमध्ये अशोककुमार हे राहतात. मंगळवारी सकाळी ते घराबाहेर पडले असता शेजाऱ्याने त्याचे दोन श्वान हे मोकळे सोडले होते. त्यावर अशोककुमार यांनी कुत्तो को ऐसे मत छोडो, काटने का डर रहता है, उनके गले मे पट्टा डालो असे सांगितले.

याचा राग शेजाऱ्यास आल्याने त्याने अशोक कुमार यांना शिवीगाळ करत मारहाण केली. त्यानंतर चाकूने त्यांच्या हातावर वार देखील केले. तुम्हाला सोडत नाही असे म्हणून त्याने लाथा बुक्क्यांनी मारहाण केली. याप्रकरणी अशोककुमार यांनी मानपाडा पोलिस ठाण्यात शेजाऱ्या विरोधात तक्रार दाखल केली आहे. दाखल तक्रारीनुसार पोलिसांनी गुन्हा दाखल करुन घेतला असून पोलिस या प्रकरणाचा तपास करीत आहेत.