नालासोपारा: बदलापूर घटनेनंतर चिमुकल्या मुलीच्या अत्याचाराच्या घटनेने संपूर्ण देश हादरला असताना, वसईत सावत्र आईने एक घृणास्पद प्रकार केला आहे. घरातील कामं करीत नसल्याने दोन चिमुकल्यांना मारहाण केली. तसेच एका 7 वर्षाच्या मुलाच्या गुप्तांगावर गरम चाकूने चटके देत अत्याचार केल्याची घटना उघड झाली आहे.

या घटनेमुळे राहत्या घरातसुद्धा चिमुकल्या मुली, मुलं सुरक्षित नसल्याचं दिसून येतंय. या प्रकरणात वसईच्या वालीव पोलीस ठाण्यात सावत्र आईविरोधात भादंवी कलम 323, 324, 504, 506 यासह अल्पवयीन मुलांची काळजी व संरक्षण कायदा 2015 कलम 75 प्रमाणे गुन्हा दाखल करण्यात आला आहे.

नेहा नागनाथ सावसगळी असे आरोपी सावत्र आईचे नाव आहे. घरातील भांडी घासणे, फरशी पुसणे, झाडू मारणे या कारणासाठी या विकृत सावत्र आईने 7 आणि 8 वर्षांच्या मुलाला लोखंडी पकडीने, पोळी लाटण्याच्या लाटण्याने मारहाण केली.

यातल्या 7 वर्षांच्या मुलाच्या तर गुप्तांगावर गरम चाकूने चटके दिले आहेत. ही घटना वडिलांना कळल्यावर सावत्र आईविरोधात वालीव पोलीस ठाण्यात गुन्हा दाखल करण्यात आला आहे. शाळेसह आता राहत्या घरातही अल्पवयीन मुलं असुरक्षित असल्याचे वसईच्या वालीव येथील घटनेवरून स्पष्ट झाले आहे.