मुंबई : रफी अहमद किडवाई मार्ग पोलिसांनी एक 53 वर्षीय महिलेविरोधात पतीला विष देऊन हत्येचा प्रयत्न केल्याप्रकरणी गुन्हा दाखल केला आहे. आरोपी पत्नीसोबत तिची बहीण आणि भावाचा सुध्दा गुन्ह्यात सहभाग असल्याचे तपासात समोर आले आहे.

या तिघा आरोपींवर पीडिताच्या बँक लॉकरमधून रोख रक्कम आणि मौल्यवान वस्तू चोरल्याचा आरोप आहे. मिळालेल्या माहितीनुसार पीडित मुंबईतील एक व्यावसायिक आहे.

पोलिसांच्या माहितीनुसार 1989 मध्ये व्यावसायिकाचे आरोपी महिलेशी लग्न झाले होते. कालांतराने 2012 पासून जोडपे त्यांच्या दोन मुली आणि एका मुलासोबत शिवडी येथे वास्तव्यास आहेत. काही वर्षांपासून जोडप्याचा आपापसात वाद सुरू आहे. तसेच व्यावसायिकाने आरोपी महिलेने त्यांच्या बँक लॉकरमधून 25 लाख रुपये रोख आणि सोन्याचे दागिने चोरल्याचा आरोप केला होता.

आरोपी महिलेकडून पतीला दररोज थोड थोड अन्नातून किंवा इतर स्वरूपात विष देण्यात येत होते. कालांतराने प्रकृती अस्वास्थ्यामुळे पीडीत पतीला रुग्णालयात दाखल करण्यात आले. उपचारादरम्यान व्यावसायिकाला विष दिल्याचे समोर आले. त्यानंतर तक्रारदाराने आरएके मार्ग पोलिस ठाण्यात या प्रकरणाची तक्रार केली.

प्राथमिक चौकशी करण्यात आल्यानंतर कट रचणे, खुनाचा प्रयत्न, चोरी, गुन्हेगारी धमकी यावरून भारतीय दंड संहितेच्या संबंधित कलमांखाली गुन्हा दाखल करण्यात आला.