डोंबिवली - डोंबिवली पूर्वेतील दावडी गावात एका अल्पवयीन विद्यार्थ्यांला दहा जणांच्या टोळक्याने बेदम मारहाण केल्याची घटना घडली आहे. दावडी गावातील नारायण महाविद्यालयाच्या बाहेरच शनिवारी हा प्रकार घडला आहे. विद्यार्थ्याला पूर्ववैमानस्यातून ही मारहाण झाल्याचे बोलले जात आहे.

अल्पवयीन विद्यार्थी नारायण महाविद्यालयमध्ये शिक्षण घेत आहे. त्याचे यापूर्वी याच महाविद्यालयातील एका विद्यार्थ्याबरोबर मोबाईलवरून भांडण झाले होते. त्या रागातून आरोपी आणि त्याचे नऊ साथीदारांनी शनिवारी संध्याकाळी महाविद्यालय सुटल्यानंतर तक्रारदार विद्यार्थ्याला नारायणा महाविद्यालयाच्या बाहेर गाठले.

तेथे त्याला आरोपी निखिल यादव, किसन आणि इतर आठजणांनी जमिनीवर पाडून बेदम मारहाण केली. तक्रारदार अल्पवयीन विद्यार्थ्याला गंभीर दुखापत झाली आहे. मारहाण केल्यानंतर आरोपी तरुण पळून गेले. अल्पवयीन विद्यार्थ्यांच्या तक्रारीवरून मानपाडा पोलीस ठाण्यात नऊ जणांविरुद्ध गुन्हा दाखल करण्यात आला आहे.