अंधेरी : महिलांशी अश्‍लील वर्तन (women molestation) करणाऱ्‍या एका रेकॉर्डवरील गुन्हेगाराला (Culprit punishment) विनयभंगाच्या एका गुन्ह्यांत किल्ला कोर्टाने शिक्षा सुनावली. राजकुमार नारायण तांडेल (Rajkumar tandel) असे या ५६ वर्षीय आरोपीचे नाव असून तो कुलाबा (culaba) येथील मच्छीमारनगर क्रमांक दोनचा रहिवासी आहे.

अलीकडेच त्याने एका महिलेचा विनयभंग केला होता. या गुन्ह्यांत दहा दिवसांत तपास पूर्ण करून एल. टी मार्ग पोलिसांनी त्याच्याविरुद्ध आरोपपत्र सादर केले होते. याच गुन्ह्यांत त्याला तीन वर्षांच्या सश्रम कारावासासह एक हजार रुपयांच्या दंडाची शिक्षा ठोठावली आहे. विनयभंगाच्या गुन्ह्यांत सतरा दिवसांत आरोपीला शिक्षा होण्याची ही पहिलीच वेळ आहे.

१८ सप्टेंबरला चर्नी रोड येथील महर्षी कर्वे रोड, स. का पाटील उद्यानाजवळ महिलांची छेडछाड होत असल्याचा संदेश प्राप्त होताच एल. टी मार्ग पोलिसांनी घटनास्थळी धाव घेतली होती. यावेळी पोलिस उपनिरीक्षक पल्लवी जाधव यांनी तिथे असलेल्या एका महिलेची चौकशी केली असता तिने राजकुमार तांडेल या आरोपीने तिच्याशी अश्‍लील वर्तन करून तिचा विनयभंग केल्याची तक्रार केली होती. राजकुमार हा रेकॉर्डवरील गुन्हेगार असून त्याच्याविरुद्ध महिलांचा विनयभंग केल्याप्रकरणी कफ परेड पोलिस ठाण्यात तीन तर आझाद मैदान पोलिस ठाण्यात एका गुन्ह्यांची नोंद आहे.