मुंबई, ता. ५ : पायधुनी येथे मित्राची हत्या करून त्याचा मृतदेह असलेली बॅग घेऊन दादर रेल्वे स्थानकात रविवारी मध्यरात्री तुतारी एक्स्प्रेसमध्ये चढण्याचा प्रयत्न करणाऱ्या मूकबधिर तरुणाला राज्य रेल्वे पोलीस आणि रेल्वे सुरक्षा बलाच्या जवानांनी गजाआड केले. या तरुणाच्या संशयास्पद हालचाली आणि बॅगेवरील रक्ताचे डाग यामुळे पोलिसांनी ही बॅग तपासली असता हा प्रकार उघडकीस आला.

यानंतर त्याच्या आणखी एका मित्राला उल्हासनगरमधून अटक केली. पोलिसांकडून रविवारी रात्री १२ च्या सुमारास दादर स्थानकातील फलाट क्रमांक ११ वर कोकणात जाणारी तुतारी एक्स्प्रेस उभी होती. या गाडीच्या सर्वसाधारण डब्यात मोठी बॅग चढवण्याचा प्रयत्न एक तरुण करत होता.

राज्य रेल्वे पोलिस दलाचे अंमलदार माधव केंद्रे आणि रेल्वे सुरक्षा बलाचे जवान संतोषकुमार यादव यांना त्याच्या हालचाली संशयास्पद वाटल्या. त्यामुळे त्यांनी जवळ जाऊन पाहिले असता त्यांना बॅगेवर रक्ताचे डाग आढळले. पोलिसांनी बॅग उघडण्यास सांगितले, तेव्हा त्याने नकार दिला. त्यामुळे पोलिसांनीच ती बॅग उघडून पाहिली असता त्यात रक्ताने माखलेला मृतदेह आढळला. त्यानंतर दादर रेल्वे पोलिसांनी तरुणाला ताब्यात घेतले. त्याचे नाव जय चावडा असून मृत व्यक्तीचे नाव अर्शद शेख असल्याचे समजते.

चौकशी सुरू

तिघांमधील वाद नेमका कशावरून झाला याची चौकशी पायधुनी पोलिसांकडून सुरू आहे. मूकबधिरांची भाषा अवगत असलेल्या मध्यस्थाच्या मदतीने पोलीस आरोपी जय आणि शिवजित यांची चौकशी करत आहेत.

आरोपी जयने सांगितले की, जय, अर्शद आणि शिवजित सिंग हे मित्र असून तिघेही मूकबधिर आहेत. जय पायधुनी परिसरात राहतो. रविवारी तिथे त्याच्या घरी एकत्र होते. तेथे त्यांच्यात वाद झाला. त्यानंतर जय आणि शिवजित यांनी अर्शदच्या डोक्यात हातोडा घातला. त्यानंतर त्याच्या शरीरावर धारदार हत्यारांनी अनेक वार केले. ही हत्या पायधुनी पोलिस ठाण्यात घडली असल्याने रेल्वे पोलिसांनी या गुन्ह्याचा तपास सोमवारी सकाळी पायधुनी पोलिस ठाण्यात वर्ग केला. पायधुनी पोलिसांनी शिवजितला उल्हासनगर येथून अटक केली आहे.

असा होता डाव

तुतारी एक्स्प्रेसमध्ये मृतदेह असलेली बॅग चढवून ती प्रवासादरम्यान संधी मिळताच खाली फेकून देण्याचा किंवा बॅग गाडीत सोडून मध्येच उतरण्याचा जय चावडाचा विचार होता.