मुंबई: कोविड लसींच्या अपुऱ्या साठ्यामुळे (Mumbai facing vaccine shortage)नागरीक हैराण होत असताना महानगर पालिका (Bmc) रोजच्या रोज नवे नियम करुन ते रात्री प्रसिध्द करत आहे. लसींचा साठा (vaccine stock) उशिराने प्राप्त होत असल्याने लसीकरणही दुपारी सुरु होत असल्याने नागरीकांना केंद्रांमध्ये ताटकळत राहावे लागत आहे. अशातच,रोजच्या रोज नव्या केंद्राचे उदघाटन करुन महानगर पालिका स्वत:ची पाठ थोपटून घेत आहे.

मुंबईत आज चार लसिकरण केंद्रांचे महापौर किशोरी पेडणेकर यांनी उदघाटन केले. यात, पवई महानगर पालिका शाळा, चुनाभट्टी प्रसूती गृह,वरळी अपोलो मिल महानगर पालिका वाहानतळ आणि वरळी येथील नॅशनल स्पोर्टस कॉम्पलेक्स ऑफ इंडिया या चार केंद्रांचे उदघाटन करण्यात आले. मात्र,लशींचा साठा अपुरा असताना उदघाटनांचा घाट का घातला जातोय असा प्रश्‍न आता नागरीकांनाही पडू लागला आहे. (Mumbai facing vaccine shortage & Bmc starting new vaccination center)

त्यात महानगर पालिका रोज रात्री ट्वीट करुन दुसऱ्या दिवशीच्या लसीकरणाबाबत माहिती देत आहे. मात्र,त्यावर तक्रारींचा पाऊसही पडू लागला आहे. लशीकरण केंद्र सुरु करता पण नोंदणीच होत नाही अशी तक्रार सर्रास केली जात आहे. तर,दिलजीत या ट्वीटर हॅन्डलवरुन पालिकेच्या या ॲानलाईन प्रक्रियेवरच प्रश्‍न उपस्थित केला आहे.

जे ट्वीटर वापरत नाही त्यांचा विचार करावा असा सल्ला या हॅन्डलवरुन देण्यात आला आहे. तर,सौमिक सरकार यांनी कोविन ॲप मध्ये नोंदणी होत नसल्याची तक्रार करताना स्क्रीन शॉटही शेअर केले आहेत. लसिकरण केंद्राची संख्या वाढल्यास ठराविक ठिकाणी होणारी गर्दी कमी होईल तसेच नागरीकांनाही घरा जवळ लस मिळेल. त्यामुळे नवे केंद्र सुरु केले जात आहे.असा दावा महानगर पालिकेने केला.

तीन दिवसांपासून प्रयत्न

कांदिवली येथील उन्नीत कोठारी हा आपल्या पालकांसह दोन पिढ्यांसाठी लस मिळवण्याचा प्रयत्न करत आहे. दोन दिवसांपुर्वी त्यांनी ऑनलाईन नोंदणीही केली होती. त्यानंतर कांदिवली ते बीकेसी असा प्रवासही केला. पण,बीकेसी केंद्रावर पोहचल्यावर लस संपल्याचे सांगण्यात आले. साठा नसताना वेळ कशी दिली असा प्रश्‍न उन्नीत यांनी विचारला आहे. दुसऱ्या दिवशीही त्यांचे लसिकरण होण्यात अडथळे आले. लॉगईन न करता कोविन ॲपवर लस उपलब्ध असल्याचे दाखवतात.पण,लॉगईन केल्यानंतर नोंदणी होत नाही.अशी तक्रार उन्नीत यांनी आज केली आहे.

नोंदणीनंतर रद्द

कोविन ॲप वर नोंदणी केल्यानंतर अचानक अनेकांना नोंदणी रद्द झाल्याचे मेसेज येत आहे. काही वेळा तर संबंधीत केंद्रच कोविन ॲप वरुन गायब झाल्याचे आढळले आहे, अशा अनेक तक्रारींचा पाऊसच पडत आहे.