मुंबईत नऊ जूनला मान्सून पावसाला सुरुवात झाल्यानंतर काही दिवस पावसाने उघडीप घेतली. मात्र कालपासून मुंबई सह पश्चिम उपनगरात पावसाला सुरुवात झाली असून हवेतील उकाडा काहीसा कमी झाला असून गारवा निर्माण झाल्याने मुंबईकरांना दिलासा मिळाला आहे. पश्चिम उपनगरात अंधेरी वर्सोवा गोरेगाव कांदिवली बोरिवली दहिसर परिसरात पहाटेपासूनच वादळी वाऱ्यासह पावसाला सुरुवात झाली असून अनेक सखल भागात पाणी साचण्यास देखील सुरुवात झाली आहे.

उपनगरातील दहिसर पूर्वेकडील एस वी रोड परिसरातील पेट्रोल पंपामोरील सखल भागात मोठ्या प्रमाणावर पाणी साचल्याचे देखील पाहायला मिळत आहे. यामुळे वाहन चालक आणि या परिसरातून पायी जाणाऱ्या नागरिकांना मोठ्या अडचणींचा सामना करावा लागत आहे.

भिवंडीत पावसाची दमदार हजेरी-

सकाळपासून अंधारल्यानंतर भिवंडी शहरात पावसाने दमदार हजेरी लावली आहे. सकाळपासून पावसाची रिपरिप सुरू होती. त्यानंतर पावसाचा जोर वाढला. त्यामुळे अनेक रस्त्यांवर, सखल भागात त्या सोबत बाजारपेठ, भाजी मार्केट, तीन बत्ती या रहदारीने गजबजलेल्या भागात दीड ते दोन फूट पाणी साचण्यास सुरवात झाली आहे. तीन बत्ती भाजी मार्केट परिसरातून मोठा नाला असून त्याची सफाई न झाल्याने या भागात दरवर्षी दुकानदारासह ग्राहकांना पाण्यातून वाट काढावी लागते. सकाळची वेळ असल्याने घाऊक भाजी मार्केटमध्ये खरेदीसाठी किरकोळ विक्रेते येत असतात या भागात पाणी साचल्याने अनेकांचा खोळंबा होत आहे.

मुसळधार पावसाचा फटका मध्य रेल्वेला देखील बसला आहे. अप अँड डाऊन बर जाणाऱ्या घीम्या गतीने धावणाऱ्या सर्व लोकल ट्रेन दहा ते पंधरा मिनिटे उशिराने धावत आहेत.  तर कल्याण वरून छत्रपती शिवाजी महाराज टर्मिनस जाणाऱ्या जलद ट्रेन वीस मिनिट उशिरा धावत असल्याने स्टेशनवर प्रवाशांची गर्दी झाली आहे.  पावसामुळे सिग्नल मिळत नसल्याने मध्य रेल्वे उशिराने धावत असून डोंबिवली स्टेशनवर देखील प्रवाशांनी गर्दी केली आहे.