मुंबई : दहावी-बारावीच्या विद्यार्थ्यांना (ssc-hsc students) ऑनलाईन परीक्षेकरिता (online exam) आंदोलनासाठी भडकावल्याप्रकरणी अटक करण्यात आलेल्या यू-ट्युब व्लॉगर (You tube vloger) हिंदुस्थानी भाऊ ऊर्फ विकास पाठकला (vikas pathak) मुंबई उच्च न्यायालयाने सोमवारी फैलावर घेतले. विद्यार्थ्यांना आंदोलनासाठी का भडकावले, असा सवाल उपस्थित करत त्याला चांगलेच फटकारले.

काही दिवसांपूर्वी परीक्षा ऑफलाईनऐवजी ऑनलाईन घेण्याची मागणी करत राज्यातील दहावी-बारावीच्या विद्यार्थ्यांनी रस्त्यावर उतरून आंदोलन केले होते. या प्रकरणात मुंबई पोलिसांनी कारवाईचा बडगा उगारत पाठकला १ फेब्रुवारी रोजी अटक केली होती. दंडाधिकारी न्यायालयाने त्याला नोटीस बजावत त्याच्याविरोधात प्रतिबंधात्मक कारवाई का करू नये, अशी विचारणा करत स्पष्टीकरण मागितले होते.

स्पष्टीकरण दंडाधिकाऱ्यांना न पटल्यास त्याच्याकडून भविष्यात सामाजिक एकात्मतेला बाधा निर्माण होईल, अशा प्रकारचे कृत्य करणार नाही, असे हमीपत्र लिहून द्यावे लागणार आहे. पाठकने नोटिशीला उच्च न्यायालयात आव्हान दिले आहे. त्यावर सोमवारी न्या. प्रसन्न वराळे आणि न्या. श्रीराम मोडक यांच्या खंडपीठासमोर सुनावणी झाली.

संबंधित याचिका निराधार असल्याचे सरकारी वकिलांनी सांगत अर्जाला विरोध केला. त्याची दखल घेत, तुम्ही विद्यार्थ्यांना सोशल मीडियाच्या मदतीने एकत्र जमण्यास सांगितले. हे तरुण विद्यार्थी असून ज्यांना सोशल मीडियाच्या माध्यमातून सहजपणे प्रभावित केले जाऊ शकते. विद्यार्थ्यांना अशा प्रकारे शिक्षण मंत्र्यांच्या घराबाहेर आंदोलन करण्याचे आवाहन करणे चुकीचे आहे, असे खंडपीठाने स्पष्ट करत नाराजी व्यक्त केली. दंडाधिकाऱ्यांना हिंदुस्थानी भाऊविरोधात सुरू करण्यात आलेल्या ‘प्रतिबंधात्मक कारवाई’अंतर्गत कोणताही अंतिम आदेश न देण्याचे निर्देश दिले.