Navi Mumbai: इंटरनेट सेवा पुरवणाऱ्या कंपनीतील दोघा कर्मचाऱ्यांना घरात डांबून बेदम मारहाण केल्याप्रकरणी मंत्रालयातील उपसचिव अमन मित्तल आणि त्यांचे भाऊ देवेष यांच्यावर गुन्हा दाखल करण्यात आला आहे.

आता या दोघांनी कर्मचाऱ्यांच्या मोबाईल फोनमधून यूपीआयद्वारे जबरदस्तीने पैसे काढून घेतल्याचा आरोप करण्यात आला आहे. त्यामुळे अमन मित्तल यांच्यावर दरोडा घातल्याचा गुन्हा दाखल करावा, अशी मागणी ॲड. स्वाती फडतरे यांनी प्रसारमाध्यमांशी बोलताना केली आहे. याबाबत मुखमंत्र्यांकडे पत्र देणार असल्याचेही त्यांनी सांगितले.

इंटरनेट सेवा पुरवणाऱ्या कंपनीत काम करणारे कर्मचारी सागर मांढरे, भूषण गुजर यांनी वकील ॲड. स्वाती फडतरे यांच्यासह गुरुवारी ऐरोली येथे पत्रकार परिषद घेतली. या वेळी अमन मित्तल आणि त्यांच्या सहकाऱ्यांनी कशा प्रकारे मारहाण केली हे त्यांनी सांगितले. इंटरनेट कंपनीकडून पैसे मिळतील हे सांगूनही अमन मित्तल यांनी यूपीआयद्वारे देवेष मित्तल यांच्या खात्यावर पैसे ट्रान्सफर करून घेतल्याचा आरोप भूषण गुजर यांनी केला.

तक्रार दाखल करून घेण्यास गेल्यानंतर पोलिसांनी ऐकून घेतल्याचा आरोप सागर मांढरे यांनी केला. दरम्यान, हा दरोड्याचाच प्रकार असल्याने मित्तल यांच्यावर दरोड्याचा गुन्हा दाखल करण्याची मागणी रबाळे पोलिसांकडे केल्याची माहिती ॲड. फडतरे यांनी केली.(Latest Marathi News)

अमन मित्तल यांच्या घणसोली सेक्टर ६ येथील सदनिकेत इंटरनेट सेवा सुरू करण्यावरून ३० डिसेंबर रोजी हा वाद झाला होता. मित्तल यांनी आपल्याला मारहाण केल्याचा आरोप मांढरे आणि गुजर यांनी केला आहे; तर या दोघांनीच आपल्याला मारहाण केल्याचा आरोप मित्तल यांनी केला आहे. याप्रकरणी रबाळे पोलिसांनी परस्परविरोधी तक्रारीनुसार दोघांवरही गुन्हे दाखल केले आहेत. दोन्ही बाजूकडील तक्रारदारांना नोटीस बजावण्यात आली आहे. पुढील तपास पोलिस करत आहेत. (Latest Marathi News)