मुंबई - एमएमआरडीएने जागृतीनगर स्थानकाच्या खाली उभारलेल्या जोडपुलाचे उद्घाटन गुरूवार, २५ मे रोजी पर्यटनमंत्री मंगलप्रभात लोढा, खासदार मनोज कोटक व आमदार राम शिंदे यांच्या उपस्थितीत झाले. यापूलामुळे हजारो वाहने अंधेरी-घाटकोपर लिंक रोड टाळून जागृतीनगरहून थेट घाटकोपर व घाटकोपरहून जांभूळपाडा जंक्शन पार करून पुढे जाऊ शकतील.

एमएमआरडीएने जागृतीनगर स्थानकाच्या खाली १०० मीटर लांबीचा जोडपूल उभा केला आहे. ज्याची पूर्व बाजू ६० मीटर आणि पश्चिम बाजू ४० मीटर आहे. २०. ३४ कोटी रुपये खर्चून एमएमआरडीएने या पुलाची उभारणी केली आहे.

अंधेरी घाटकोपर लिंक रोड वेस्टर्न एक्सप्रेस वे (डब्ल्यूईएच) ते ईस्टर्न एक्सप्रेस वे (ईईएच) यांना जोडणारा प्रमुख दुवा आहे. हा रस्ता मुंबई आंतरराष्ट्रीय व घरगुती विमानतळाशीही जोडला जातो. तसेच, सीप्झ सारख्या औद्योगिक क्षेत्राशी देखील जोडलेला आहे.