डोंबिवली : कल्याण पश्चिमेला असलेल्या स्कायवॉकवर गर्दुल्ले, भिकारी यांचा कायम वावर असतो. यातीलच एक व्यक्ती शुक्रवारी सकाळी स्कायवॉकच्या बाहेर असलेल्या जाळीवर चक्क जाऊन बसला. धोकादायक अवस्थेतील त्याचा तो वावर पहाता कामावर जाण्याची घाई असताना सुद्धा नागरिक थांबून थांबून त्याला पहात होते. टीवची माहिती स्थानिक पोलीस व अग्निशमन दलास मिळताच त्यांनी घटनास्थळी धाव घेत सदर व्यक्तीला सुरक्षित खाली उतरवले. त्या व्यक्तीची मानसिक स्थिती ठीक नसून त्याला महात्मा फुले चौक पोलिसांच्या हवाली करण्यात आले आहे.

कल्याण पश्चिमेला असलेल्या कल्याण डोंबिवली महानगरपालिकेच्या स्कायवॉकवर कायम भिकारी, गर्दुल्ले यांचा वावर राहिला आहे. यामुळे प्रवाशांना अनेकदा त्रास ही सहन करावा लागला आहे. सध्या रेल्वे स्टेशन परिसरात स्मार्ट सिटी अंतर्गत काम सुरू असून या स्कायवॉकचा ढाचा काढण्यात येत आहे. यामुळे नागरिकांचा वावर कमी असला तरी गर्दुल्ले, भिकारी आज ही या स्कायवॉक वर असतात. शुक्रवारी सकाळी असाच एक व्यक्ती स्कायवॉकच्या जाळीवर चक्क जाऊन पाय खाली सोडून बसला. त्याचे ते वर्तन पाहून सकाळी कामावर जाण्याची घाई असतानाही नागरिक थांबून थांबून त्याच्याकडे पहात होते. यामुळे रस्त्यावर बघ्यांची गर्दी झाली होती. काहींनी त्याचा व्हिडिओ बनवत सोशल मीडियावर व्हायरल केला.

काही नागरिकांनी याविषयी ची माहिती महात्मा फुले चौक ठाण्यातील पोलिसांना दिली. तसेच अग्निशमन दलास देखील साधारण 10.30 च्या सुमारास माहिती देण्यात आली. अग्निशमन दलाचे कर्मचारी घटनास्थळी दाखल झाले. त्यानंतर सिडीच्या सहाय्याने त्याला सुरक्षित खाली उतरवले. सदर व्यक्तीची मानसिक स्थिती ठीक नसल्याची बाब समोर आली असून त्याला पोलिसांच्या ताब्यात देण्यात आले आहे.