मुंबई : गरज नसताना मोटारीची विमा पॉलिसी संरक्षण तात्पुरते बंद केल्यास तेवढा हप्ताही लागणार नाही व त्या रकमेची सवलतही पॉलिसी नूतनीकरणाच्या वेळी मिळू शकेल, असा अनोखा कार इन्शुरन्स कोटक जनरल इन्शुरन्सने आणला आहे.

कोटक जनरल इन्शुरन्स चे एमडी व सीईओ सुरेश अग्रवाल यांनी आज येथे ही माहिती दिली. संरक्षण तात्पुरते बंद केल्यापोटीचा सवलत परतावा तीन प्रकारे मिळेल. तसेच संरक्षण बंद असतानाही विशिष्ट दुर्घटनांसाठी विमा संरक्षण मिळत राहील. अर्थात त्यासाठी ही मोटार प्रवासात नसणे आवश्यक आहे.

यासाठी कोटकचा कार विमा घेणाऱ्या ग्राहकांना कोटक मीटर ॲप डाऊनलोड करायला लागेल. त्यावर आपला पॉलिसी क्रमांक व अन्य तपशील नोंदवल्यावर ही योजना सुरू होईल. ज्या दिवशी मोटार प्रवासात नसेल त्यादिवशी आपल्याला विम्याची गरज नसल्यामुळे पॉलिसी तात्पुरती बंद करता येईल. पॉलिसी किमान एक दिवस बंद केली तरच तिचा हप्ताही लागणार नाही. याचा परतावा आपल्याला पॉलिसीचे पुढील नूतनीकरण करताना मिळू शकेल. तो रोख स्वरूपात किंवा पुढील पॉलिसीच्या रकमेतून ते पैसे वळते करून किंवा पुढील पॉलिसीतील तेवढा रकमेचे दिवस वाढवून मिळू शकतो. मात्र ही रक्कम जास्तीत जास्त पॉलिसी रकमेच्या ४० टक्केच असेल असेही अग्रवाल म्हणाले.

पॉलिसी संरक्षण तात्पुरते बंद केल्यावर मोटार प्रवासात असेल तर अर्थातच या संरक्षण सवलतीचा लाभ मिळणार नाही. मात्र पॉलिसी संरक्षण बंद असताना मोटारही पार्किंग मध्ये ठेवली असेल तर ॲक्ट ऑफ गॉड या सदरात मोडणाऱ्या गोष्टींनी मोटारी चे नुकसान झाल्यास (उदा. दंगे, पूर, चोरी) त्याची नुकसानभरपाई मिळू शकते असेही अग्रवाल यांनी सांगितले.