Dombivli: फलाटाचा विस्तार केला पण छतच टाकले नाही, तर कुठे काम सुरू असल्याने छताचे पत्रे काढलेत अशी स्थिती डोंबिवली रेल्वे स्थानकाची आहे. यामुळे गेले कित्येक महिने डोंबिवलीकर उन्हाचा त्रास सहन करत होते आता त्यांना पावसाचा मारा सहन करावा लागत आहे. बदलापूर स्थानकात देखील काहीशी अशीच परिस्थिती होती.

भिवंडी खासदारांनी बदलापूर स्थानकाची पाहणी करतात रेल्वे प्रशासनाने येथे तात्पुरत्या स्वरूपाचे शेड उभारले. मात्र डोंबिवलीकरांना ही सुविधा देण्यास रेल्वे प्रशासन विसरले. कल्याण लोकसभेचे खासदार रेल्वे प्रवाशांच्या या समस्येकडे कधी लक्ष देणार असा सवाल या निमित्ताने उपस्थित केला जात आहे.

डोंबिवली रेल्वे स्थानकातील फलाट क्रमांक पाचवर सीएसएमटी बाजूकडील विस्तारित फलाटाच्या भागावर गेल्या वर्षापासून छत नाही. त्यामुळे गेले आठ महिने उन्हाचा त्रास सहन करणाऱ्या प्रवाशांना आता लोकलमध्ये चढताना पावसाचा मारा सहन करावा लागत आहे. गेल्या वर्षापासून प्रवाशांंकडून, रेल्वे प्रवासी संघटनांकडून डोंबिवली रेल्वे स्थानकातील फलाट क्रमांक पाचवरील विस्तारित भागात छत बांधण्याची मागणी रेल्वे अधिकाऱ्यांंकडे केली जात आहे.

या कामासाठी निधी मंंजूर आहे. काम लवकर सुरू होणार आहे, अशी आश्वासने अधिकारी वर्षभर देत आहेत. प्रत्यक्षात मात्र काम सुरू होत नसल्याने प्रवाशांमध्ये नाराजीचे वतावरण आहे.

कडक उन्हाच्या झळा सोसल्यानंतर आता पावसास सुरुवात झाली आहे. पाऊस आल्यावर फलाट क्रमांक पाच वरील प्रवाशांना छत असलेल्या भागात धावत जावे लागते. राहावे लागते. लोकल डोंबिवली रेल्वे स्थानकात येत आहे हे दिसल्यावर मग प्रवासी छताखालून निघून छत नसलेल्या भागात जातात.

यावेळी हातात छत्री असल्याने लोकलमध्ये चढताना प्रवाशांना त्रास सहन करावा लागतो. तसेच छत्री बंद करून गाडीत चढे पर्यत प्रवासी पावसाने ओलेचिंब होत आहेत. या सगळ्या गडबडीत महिला प्रवाशांची सर्वाधिक कुचंबणा होत आहे.

वातानुकूलित लोकलने प्रवास करणाऱ्या प्रवाशांना तर लोकलचे दरवाजे काही सेकंदांनी उघडतात. त्यानंतर लोकलमध्ये चढावे लागते. रेल्वे प्रशासनाने डोंबिवली रेल्वे स्थानकातील प्रवाशांचे होणारे हाल विचारात घेऊन फलाट क्रमांक पाचवर छत टाकण्याचे काम सुरू करण्याची मागणी केली जात आहे.

डोंबिवली, कल्याण रेल्वे स्थानकातील फलाटांवर अनेक ठिकाणी सरकते जिने, लिफ्ट, छताची डागडुजीची कामे सुरू आहेत. काही ठिकाणी पादचारी पूल उभारण्यात आले आहेत. ते स्कायवाॅकला जोडण्यात आले आहेत.

या तांत्रिक बाबींमुळे अनेक ठिकाणी रेल्वे स्थानकात पावसाचे पाणी गळत आहे. डोंबिवली, कल्याण रेल्वे स्थानकाचा बहुतांशी भाग पावसाच्या पाण्याने गळत असल्याने प्रवाशी नाराजी व्यक्त करत आहेत.

बदलापूर, टिटवाळा रेल्वे स्थानकात देखील काहीशी अशीच परिस्थिती आहे. भिवंडीचे नवनिर्वाचित खासदार सुरेश उर्फ बाळ्या मामा म्हात्रे यांनी मध्यंतरी बदलापूर रेल्वे स्थानकाची पाहणी केली होती. त्यांनी प्रवाशांच्या समस्या जाणून घेतल्या.

यानंतर रेल्वे प्रशासनाने स्थानकात तात्पुरत्या स्वरूपाचे शेड उभारून बदलापूरकर प्रवाशांना काहीसा दिलासा दिला आहे. मात्र इतर स्थानकात ही सुविधा देण्यास रेल्वे प्रशासन विसरले.

भिवंडी खासदारांनी पाहणी केल्यावर प्रवाशांना सुविधा मिळाली. मग कल्याण लोकसभेचे खासदार डॉ. श्रीकांत शिंदे कल्याण, डोंबिवली, टिटवाळा रेल्वे स्थानकाची पाहणी कधी करणार जेणेकरून रेल्वे प्रशासनाला जाग येईल अशी विचारणा डोंबिवलीकर करत आहेत.