मुंबई - छत्रपती शिवाजी महाराज टर्मिनसवरील फलाट क्रमांक दोनवरील लोकलच्या छतावर नशेच्या धुंदीत एक प्रवासी चढल्याने हार्बर मार्गावरील लोकल सेवांवर परिणाम झाला आहे. ही घटना रात्री साडे नऊच्या सुमारास घडल्याने कामावरून घरी जाणाऱ्या प्रवाशांचे हाल झाले आहेत.

मिळालेल्या माहितीनुसार, छत्रपती शिवाजी महाराज टर्मिनस (सीएसएमटी) येथील हार्बर लाईनच्या फलाट क्रमांक २ वर पनवेलच्या दिशेने जाण्यासाठी सायंकाळी नऊच्या सुमारास लोकल सीएसएमटी स्थानकात आली असता एका व्यक्तीने गाडीच्या छतावर चढून ओव्हर हेड वायरला स्पर्श केला. त्यामुळे मोठा आवाज होऊन तो बाजूला फेकला गेला. परिणामी फलाटावरील प्रवाशांमध्ये एकच घबराट उडाली. तसेच अनेकांनी गाडीतून बाहेर धाव घेतली.

घटनेची माहिती मिळताच आरपीएफच्या जवानांनी धाव घेत संबंधितला खाली उतरवले. या घटनेमुळे सीएसएमटी स्थानकांवर येणाऱ्या लोकल एकामागेएक उभ्या होत्या. त्यामुळे लोकल सेवांच्या वेळापत्रकावर मोठा परिणाम झाला. त्यामुळे काही काळ हार्बर मार्गावरील वाहतूक विस्कळीत झाली होती. प्रवाशांचे हाल झाले आहेत.