मुंबई: गेले काही दिवस राज्यातील कोरोनाबाधितांचा आकडा वाढताना दिसत आहे. या पार्श्वभूमीवर राज्यातील लोकल सेवा सुरू राहणार की बंद होणार यावर सध्या चर्चा सुरू आहे. मिनी लॉकडाउन करूनही अद्याप कोरोनाबाधितांचा आकडा कमी होताना दिसत नाही. त्यामुळे पुन्हा एकदा सर्वसामान्यांसाठी लोकल सेवा बंद करण्यात येणार का? असा सवाल उपस्थित केला जात आहे. याबद्दल राज्याचे मदत आणि पुनर्वसन मंत्री विजय वडेट्टीवार यांनी, प्रवाशांवर निर्बंध लादले जाण्याची शक्यता वर्तवली होती. त्याच अनुषंगाने आज मध्ये रेल्वेने एक महत्त्वाचा निर्णय जाहीर केला.

'पहचान कौन?'; अमृता फडणवीसांचा उद्धव ठाकरेंना टोला

लांब पल्ल्याच्या रेल्वे गाड्यांमध्ये जाणाऱ्या प्रवाशांसोबत त्यांना सोडायला येणारी गर्दी भरपूर असते. ही गर्दी कमी करण्यासाठी सुरूवातीला प्लॅटफॉर्म तिकीटाचा दर १० रूपयांवरून ५० रूपयांवर नेण्यात आला. पण गर्दी अपेक्षेइतकी कमी झाली नाही. त्यामुळे आता मध्य रेल्वेकडून एक कठोर निर्णय घेण्यात आला आहे. मध्ये रेल्वेच्या छत्रपती शिवाजी महाराज टर्मिनस, दादर, पनवेल, ठाणे, कल्याण आणि लोकमान्य टिळक टर्मिनस या सहा स्टेशनांवर प्लॅटफॉर्म तिकीटांची विक्री बंद करण्याचा निर्णय मध्ये रेल्वेने घेतला आहे. त्यामुळे आता केवळ रेल्वेचे तिकीट असेल तरच स्टेशनच्या आत प्रवेश मिळणार आहे.

मुंबईतील लसीकरण थांबलं! केंद्रांवर नागरिकांची गर्दी अन् संताप

मुंबई विभागात कोरोनाबाधितांचा वाढणारा आकडा आटोक्यात आणण्याच्या दृष्टीने हा महत्त्वपूर्ण निर्णय घेण्यात आल्याची माहिती मध्ये रेल्वेच्या जनसंपर्क अधिकाऱ्यांनी दिली. लोकल सेवेवर निर्बंध लावले जातील असे संकेत काल वडेट्टीवार यांनीही दिले. "लोकल सुरू करावी यासाठी आमच्यावर प्रचंड दबाव आणण्यात आला होता. कामगार आणि चाकरमान्यांचा रोजगार बुडत होता म्हणून आपण लोकल सुरू करण्याचा निर्णय घेतला. पण सध्या रेल्वेमध्ये पुन्हा गर्दी दिसू लागली आहे. त्यामुळे लोकल बंद करावी की मागच्या वेळेप्रमाणे लोकल सेवेबाबत काही निर्बंध लागू करावेत, याबद्दल आमचा विचार सुरू आहे", अशी माहिती वडेट्टीवार यांनी गुरूवारी प्रसारमाध्यमांना दिली.