कोरोना लसीचे दोन्ही डोस घेतलेल्या नागरिकांना मुंबईत लोलकमधून १५ ऑगस्टपासून प्रवास करता येणार आहे. याबाबतची घोषणा मुख्यमंत्री उद्धव ठाकरे यांनी केली होती. यासाठी क्यूआर कोडची सुविधा करण्यात येणार होती. मात्र, क्यूआर कोडवरुन रेल्वे आणि राज्यांत मतभेद असल्याचं समोर आलं. या गोंधळानंतर मुंबईकर पेचात पडले होते. पास कसा मिळवायचा? कुठे मिळवायचा? दोन डोस कसे ग्राह्य धरायचे? यासारखे प्रश्न त्यांच्यासमोर होते. या सर्व प्रश्नांची उत्तरे मुंबईच्या माहापौर किशोरी पेडणेकर यांनी पत्रकार परिषद घेत दिली आहे. यावेळी त्यांनी गर्दी करु नका, अन् कोरोना नियमांचं पालन करा असं आवाहनही केलं आहे.

राज्य सरकार आणि रेल्वे दोघे मिळून क्यूआर कोड आणि लोकल प्रवासासंदर्भात अॅक्शन प्लॅन तयार करत आहेत. मुंबईच्या 65 रेल्वे स्थानकावर क्यूआर कोड मिळणार आहे, त्यामुळे क्यूआर कोड मिळवण्यासाठी गर्दी करु नका, असं आवाहन मुंबई महापौर किशोरी पेडणेकर यांनी मुंबईकरांना केलं आहे. दोन दिवसांत लोकल पाससाठी मुंबई महापालिका अॅप तयार करणार आहे. या अॅपवर दोन डोस घेतलेल्यांचं लसीचं प्रमाणपत्र असणार आहे, तसेच 32 लाख प्रवाशांसाठी हा आराखडा तयार करण्यात येत असल्याची माहितीही यावेळी त्यांनी दिली.

लसीचे दोन डोस घेतलेल्यानंतर दोन आठवड्यानंतर लोकलमध्ये प्रवास करण्याची मुभा मिळणार आहे. जर आता तुम्ही दुसरा डोस घेतला असेल तर लगेच तुम्हाला लोकलमध्ये प्रवास करता येणार नाही. दोन डोस घेतल्यानंतर 15 दिवसानंतरच तुम्हाला लोकलमध्ये प्रवासासाठी पास दिला जाणार आहे. मुंबई महापालिका आणि राज्य सरकारच्या माध्यमातून क्यूआर कोडसाठी अॅप तयार करण्यात येत आहे. रेल्वे स्थानकावर क्यूआर कोड, पास आणि लोकल तिकटं मिळतील, त्यासाठी रांगा लागतील. मात्र, कोरोनाचे नियम मोडू नका, मास्क वापरा, असं महापौर म्हणाल्या.