मुंबई : मुंबई-पुणे द्रुतगती महामार्ग आणि जुन्या महामार्गावरून एकत्र येणारी घाटातील वाहतुक कोंडी कमी करण्याच्या दृष्ट्रीने महाराष्ट्र राज्य रस्ते विकास महामंडळाने मिसिंग लिंकची उभारणी केली जात आहे. सध्यास्थितीत ९० टक्के लिंकचे काम पुर्ण झाले असून, एमएसआरडीसी अधिकाऱ्यांनी दिलेल्या माहितीनुसार जुन अखेर लिंकचे काम पुर्ण होण्याची शक्यता आहे.

सातत्याने मुंबई-पुणेसाठी वेगवान पद्धतीने वाहतुक करणाऱ्या वाहनांची संख्या द्रुतगती महामार्गावर दिवसेंदिवस वाढत आहे. त्यामूळे वाहतुक कोंडी आणि अपघातांचे प्रमाण सुद्धा वाढतांना दिसून येत आहे. मिसींग लिंक सुरू केल्यास घाटातील वाहतुक कोंडी कमी होणार असल्याचा दावा एमएसआरडीसीने केला आहे.

मुंबई पुणे द्रुतगती मार्ग (मिसिंग लिंक) प्रकल्पांतर्गत सध्याच्या द्रुतगती मार्गावरील खालापूर ते खोपोली इंटरचेंज या ५.८६ कि.मी. लांबीच्या रस्त्याचे ८ पदरीकरण करण्यात आले आहे. तर खोपोली एक्झिट से कुसगाव (सिंहगड संस्था) या भागातील १३.३ कि. मी. च्या राहिलेल्या लांबीसाठी १.६८ कि.मी आणि ८.८७ कि.मी चे दोन बोगदे करण्यात आले आहे.

दोन व्हायाडक्टचे बांधकाम असे एकूण १९.८४ कि.मी. लांबीचा ८ पदरी रस्ता बांधणे प्रस्तावित आहे. सदर प्रकल्पामुळे सध्याचे खोपोली एक्झिट सिहगड संस्था १९ कि.मी. चे अंतर ६ कि.मी. ने कमी होवून १३.३ कि.मी. इतके होईल व प्रवासाच्या वेळेत २० ते २५ मिनीटांची बचत होणार आहे.