मुंबई -भाजप नेते मोहित कंबोज आणि इतरांविरुद्ध सुमारे 100 कोटीच्या फसवणुकीच्या प्रकरणात सीबीआयने दाखल केलेला क्लोजर रिपोर्ट मुंबईतील अतिरिक्त मुख्य महानगर दंडाधिकारी न्यायालयाने फेटाळला.टेनेट एक्झिम प्रायव्हेट लिमिटेडचे मुख्य व्यवस्थापकीय संचालक आणि भाजप नेते मोहित कंबोज तसेच अन्य आरोपींनी 100 कोटींची बँकेची फसवणूक केल्याचा आरोप आहे.

सीबीआयकडे या प्रकरणी पीके जगन, डेप्युटी जनरल मॅनेजर, सेंट्रल बँक ऑफ इंडिया यांच्या तक्रारीवर टेनेट एक्झिम प्रायव्हेट लिमिटेड आणि तिचे संचालक/जामीनदार आणि चार्टर्ड अकाउंटंट यांच्याविरुद्ध बँकेची फसवणूक केल्याबद्दल गुन्हा दाखल केला होता. टेनेट एक्झिम कंपनी तिचे सीएमडी कंबोज आणि संचालक आणि अन्य आरोपींना यांनी खोटी कागदपत्रे सादर करून बँकेची फसवणूककेल्याचा आरोप आहे.

आरोपांमध्ये बँकेकडून 50 कोटी रुपयांची क्रेडिट सुविधा मिळविण्यासाठी खोटे कागदपत्रे दाखल करण्याचा समावेश आहे. आरोपींनी अप्रामाणिकपणे कर्जाचा निधी कंपनीतून इतर बँक खात्यात वळवण्यात आला. बँकेचे सुरुवातीला 103.81 कोटी रुपयांचे नुकसान झाले आणि 26 फेब्रुवारी 2020 रोजी वन-टाइम सेटलमेंटनंतर ते 94.39 कोटी रुपयांवर आले.सीबीआयने सादर केलेला अंतिम अहवाल फेटाळताना न्यायालयाने सीबीआयच्या तपास अपूर्ण असल्याचे मत नोंदवले आहे. न्यायालयाने खोटी कागदपत्रे सादर करण्याचा या गुन्ह्यांचा आरोप असल्याचे कारण दिले आहे.