मुंबई : शिवसेना विरुद्ध शिंदे गट यांच्यातील राजकीय संघर्ष दिवसेंदिवस अधिकाधिक तीव्र होताना दिसत आहे. शिंदे गटाने दादर येथेच प्रति शिवसेना भवन उभारण्याची घोषणा केल्यानंतर शिंदे गटाची पहिली शाखा मुंबईतील मानखुर्द येथे सुरू करण्यात आली आहे. खासदार राहुल शेवाळे यांनी ही शाखा सुरू केली आहे. प्रति शिवसेना भवन उभारण्यासाठी शिंदे गटाकडून दादरमध्ये जागा निश्चित करण्यात आल्याचे आमदार सदा सरवणकर यांनी जाहीर केल्यानंतर शेवाळे यांनी थेट शाखाच सुरु करून त्या दिशेने आता पहिले पाऊल टाकले आहे.

शिंदे गटाकडून सुरू केलेल्या या शाखेच्या बाहेर उभारलेल्या फलकावर शिवसेनाप्रमुख बाळासाहेब ठाकरे, आनंद दिघे, मुख्यमंत्री एकनाथ शिंदे आणि खासदार राहुल शेवाळे यांची छायाचित्रे आहेत. मात्र, यावर उद्धव ठाकरे, आदित्य ठाकरे यांची छायाचित्रे नसल्याने चर्चा सुरु झाली असून त्यावरुन स्थानिक कार्यकर्त्यांमध्ये संघर्ष अधिक तीव्र होण्याची शक्यता आहे.

शिंदे गटाची ही पहिली शाखा मानखुर्दमध्ये सुरू करण्यात आली आहे. त्यानंतर आता मुंबईतील प्रत्येक वॉर्डमध्ये अशाच प्रकारची शाखा सुरू करण्यात येणार आहे.

-राहुल शेवाळे, खासदार, शिंदे गट