मुंबई - पावसाळ्यात अतिधोकादायक इमारतींपैकी २७ इमारतींचे वीज पाणी कनेक्शन कट केले आहे. १९३ इमारती धोकादायक झाल्याने जमीनदोस्त करण्यात आल्या आहेत. तर ८२ इमारती रिकाम्या केल्या असून १०१ इमारतींचा प्रश्न न्यायप्रविष्ट असल्याचे पालिका प्रशासनाकडून सांगण्यात आले.

मुंबईतील अतिधोकादायक इमारतींचे पावसाळ्यापूर्वी सर्व्हेक्षण करण्यात येते. या सर्व्हेक्षणात अतिधोकादायक इमारती असल्याचे निदर्शनास आल्यास रहिवाशांनी अन्य ठिकाणी स्थलांतरित व्हावे, यासाठी मुंबई महापालिकेच्या माध्यमातून नोटीस बजावण्यात येते. मात्र इमारतीतील रहिवासी न्यायालयात दाद मागतात आणि प्रकरण न्यायप्रविष्ट असल्याने मुंबई महापालिका प्रशासनाला कार्यवाही करणे शक्य होत नाही.

त्यामुळे अशा धोकादायक इमारती राहणाऱ्या रहिवाशांच्या जीवाला पावसाळ्यात इमारत अथवा इमारतीचा भाग कोसळून जिवितहानी होण्याचा धोका असतो. त्यामुळे इमारत खाली करत अन्य ठिकाणी स्थलांतरित व्हावे, असे आवाहन पालिका आयुक्त व प्रशासक डॉ इकबाल सिंग चहल आणि अतिरिक्त आयुक्त आशीष शर्मा यांनी केले आहे.

मुंबईतील इमारतींचे सर्वेक्षण करून अतिधोकादायक इमारतींची यादी जाहीर करण्यात येते. यामध्ये मोठी दुरुस्ती आवश्यक असलेल्या इमारतींचा समावेश ‘सी-२’ करून तातडीने दुरुस्ती करण्याचे निर्देश देण्यात येतात. तर जीर्ण झालेल्या इमारतींचा समावेश ‘सी-१’ म्हणजेच ‘अतिधोकादायक’ श्रेणीत करून या इमारती तत्काळ रिकामी करण्याचे निर्देश देण्यात येतात. नोटीस बजावूनही या इमारती रिकामी न केल्यास वीज-पाणी कापण्याची कारवाई करण्यात येत. दरम्यान, दुर्घटना करण्यासाठी मुंबईतील ३० वर्षांपेक्षा जास्त कालावधी झालेल्या इमारतींचे स्ट्रक्चरल ऑडिट करून घ्यावे, असे आवाहन पालिका प्रशासनाकडून करण्यात आले आहे.

अतिधोकादायक इमारतींची स्थिती

• एकूण अतिधोकादायक इमारती - ४२९

• पालिकेकडून पाडण्यात आल्या - १९३

• कोर्टात प्रलंबित प्रकरणे - १०१

• रिकाम्या केलेल्या इमारती - ८२

• वीज-पाणी कापले - २७

धोकादायक इमारती

• शहर - ३२

• पूर्व उपनगर - ६५

• पश्चिम उपनगर - १२०