मुंबई : मुंबईचे महापालिका आयुक्त इक्बाल चहल यांची केंद्रात बदली झाल्याची माहिती समोर आली आहे. चहल यांना बढती मिळाली आहे. आता त्यांची नियुक्ती केंद्रात सचिव पदावर करण्यात आली आहे. मुंबईतील कोरोना रूग्णवाढीच्या काळात त्यांनी मुंबई आयुक्तपदाची जबाबदारी देण्यात आली होती. त्यानंतर त्यांनी कोरोनाचा प्रसार रोखण्यासाठी शहरात अनेक कठोर उपाय योजना राबवल्या होत्या. (Iqbal Singh Chahal Transfer)

याबाबत माहिती देताना इक्बाल सिंह चहल म्हणाले आहेत की, मला हे सांगताना आनंद होत आहे की, भारत सरकारने मला केंद्रात सचिव पदाचा दर्जा दिला आहे. आयएएस अधिकाऱ्याच्या कारकिर्दीतील या पदावर नियुक्ती ही सर्वाधिक अभिमानाची बाब असल्याचे त्यांनी सांगितेले.

इक्बाल चहल हे 1989 च्या बॅचचे आयएएस अधिकारी आहेत. अनेक महत्वाच्या जबाबदाऱ्या त्यांनी पार पाडल्या आहेत. चहल हे यापूर्वी नगरविकास विभागाचे प्रधान सचिव होते. तसेच जलसंपदा विभागातही त्यांनी प्रधान सचिव म्हणूनही काम केलं आहे. त्यांनी केंद्रीय गृहमंत्रालयाच्या सहसचिवपदीही तसेच औरंगाबाद, ठाणे येथे जिल्हाधिकारी म्हणून देखील त्यांनी काम केले आहे.