मुंबई - राष्ट्रीय विज्ञान दिनाच्या निमित्ताने यंदाच्या वर्षाची संकल्पना ही ग्लोबल सायन्स फॉर ग्लोबल वेलबिंग अशी आहे. मानवी कल्याणासाठी जागतिक पातळीवर संशोधन आणि नाविण्यपूर्ण संकल्पना विकसित करण्याच्या अभ्यासक्रमाला चालना देणारी यंदाच्या वर्षाची संकल्पना आहे. त्यामध्ये वैज्ञानिक, संशोधक आणि धोरण निर्माण करणाऱ्यांमध्ये समन्वय निर्माण करणे हा उद्देश असणार आहे. त्यासोबतच पर्यावरणीय बदल, शाश्वत विकास, जागतिक आरोग्य यासारख्या आव्हानांच्या निमित्ताने सोल्यूशन निर्माण करणे हेदेखील अभिप्रेत आहे.

यंदाच्या वर्षी लहान मुलांसाठीही संपूर्ण आठवड्याभराच्या प्रदर्शन, व्याख्याने, विज्ञान प्रश्नमंजुषा, घोषवाक्य लिहिण्याची स्पर्धा, कार्यशाळा, पथनाट्ये यासारख्या माध्यमातून विविध कार्यक्रमाचे आयोजन करण्यात आले होते. या कार्यक्रमाच्या बक्षीस वितरणाचा कार्यक्रम विज्ञान दिनाच्या निमित्ताने नेहरू विज्ञान केंद्र येथे होणार आहे.

रोजच्या जगण्यातील सोप्या विज्ञानाचा वापर या सगळ्या स्पर्धांची थीम होती. त्यामुळे विज्ञान आणि तंत्रज्ञान विषयाकडे अधिकाधिक लोकांनी आकर्षित व्हावे असा या जागरूकतेचा उद्देश होता. सोबतच मुलांना वैज्ञानिकांशी, तज्ज्ञांशी आणि विविध क्षेत्रातील अभ्यासकांसोबत संवाद साधण्याची संधी मिळाली. त्यामुळे या कार्यक्रमाच्या माध्यमातून विद्यार्थी, शिक्षक आणि सामान्य लोकांनाही या कार्यक्रमात सहभागी होण्याची संधी मिळाली.

दरवर्षी राष्ट्रीय विज्ञान दिनाच्या निमित्ताने नेहरू विज्ञान केंद्राच्या माध्यमातून शाळेतील विद्यार्थ्यांसाठी विविध स्पर्धांचे आयोजन करण्यात येते. यंदाच्या वर्षी २२ फेब्रुवारी ते २८ फेब्रुवारी या कालावधीत विविध स्पर्धांचे आयोजन करण्यात आले होते. भारताचे वैज्ञानिक सी व्ही रमण यांच्या भौतिक शास्त्रातील रमण इफेक्ट या थिअरीच्या शोधाच्या २८ फेब्रुवारी १९२८ या वर्षातील शोधाच्या निमित्ताने विज्ञान दिन साजरा केला जातो.