मुंबई : वांद्रे पश्चिम येथे एमएमआरडीचे काम सुरु असताना आज (ता. 11) दुपारी 3.30 वाजण्याच्या सुमारास 9 इंचाची जलवाहिनी फुटली. पालिकेच्या जल अभियंता विभागाने तत्काळ घटनास्थळी धाव घेवून युद्धपातळीवर दुरुस्तीचे काम पूर्ण केल्याने वांद्रे पश्चिम येथील पाणीपुरवठ्यावर कुठलाही परिणाम झाला नसल्याचे पालिका प्रशासनाकडून सांगण्यात आले.

वांद्रे पश्चिम बडी मस्जिद येथे एमएमआरडीएच्या माध्यमातून काम सुरु आहे. या कामा दरम्यान वांद्रे पश्चिम स्थानकाजवळ असलेली 9 इंचाची जलवाहिनी फुटली. यामुळे वांद्रे पश्चिम स्टेशन परिसर व महालक्ष्मी परिसरातील पाणीपुरवठ्यावर परिणाम झाला होता. परंतु जल अभियंता विभागातील अधिकारी आणि कर्मचाऱ्यांनी युद्धपातळीवर दुरुस्तीचे काम हाती घेत दुरूस्तीचे काम पूर्ण केल्याने या भागातील पाणीपुरवठा पूर्ववत झाल्याचे पालिका प्रशासनाकडून सांगण्यात आले.