डोंबिवली - अंबरनाथ बदलापूर पाईपलाईन रोड रस्त्याचे सिमेंट कॉंक्रीटीकरणचे काम अनेक ठिकाणी सुरू आहे. तसेच पावसाळ्यात खड्डे पडून या रस्त्याची चाळण झाली आहे. यात भरीस भर म्हणून येथील पथदिवे ही बंद असल्याने हा महामार्ग अंधारात गेल्याचे चित्र आहे. हा अंधार अपघातांना निमंत्रण देत

असून वाहनचालक डोळ्यात तेल घालून रात्रीचा प्रवास करत आहेत. गेले कित्येक महिने येथील पथदिवे हे बंद अवस्थेत असून एमआयडीसी प्रशासनाचे याकडे लक्ष नसल्याचे दिसून येत आहे.अंबरनाथ बदलापूर पाईपलाईन रोड हा वाहतुकीच्या दृष्टीने अत्यंत महत्वाचा असा महामार्ग आहे. कल्याण शीळ रोड मार्गे उल्हासनगर, अंबरनाथ, बदलापूरला जायचे असल्यास वाहने या मार्गाचा वापर करतात.

अंबरनाथ एमआयडीसी मधील जर अवजड वाहने तसेच आजूबाजूच्या गावातील नागरिक देखील याच मार्गाचा वापर करतात. या रस्त्याचे सिमेंट काँक्रीटीकरणचे काम करण्यात येत आहे. अनेक ठिकाणी रस्त्याचे काम सुरू असल्याने रस्त्यांची दुरावस्था आहे. तर काही ठिकाणी खड्डे पडून रस्ते खराब झालेले आहेत. यामुळे वाहनांना वाहन चालविताना कसरत करावी लागते.

त्यात रात्रीच्या वेळी येथील पथदिवे देखील बंद असल्याने अंधारात खड्डेतून प्रवास करताना चालक हैराण झाले आहेत. अंधारात खड्डे समजत नसल्याने वाहने आदळून वाहनांचे नुकसान होते शिवाय चालकांना देखील त्रास सहन करावा लागत आहे. बंद पथदिवे आणि खड्ड्यांमुळे वाहतुकीचा वेग मंदावत असून अनेकदा वाहन कोंडी होते

या सर्व समस्या लक्षात घेता किमान या मार्गावरील पथदिवे सुरू करण्याची मागणी जोर धरत आहे. बदलापूर पाईपलाईन रोड हा एमआयडीसी कडे असल्याने एमआयडीसी प्रशासनाने येथे लक्ष देणे गरजेचे आहे. मात्र प्रशासन याकडे साफ दुर्लक्ष करत असल्याने नागरिकांमध्ये नाराजीचे वातावरण आहे.