मुंबई : म्हाडाच्या मुंबई गृहनिर्माण व क्षेत्रविकास मंडळातर्फे नुकत्याच जाहीर करण्यात आलेल्या ४०८२ सदनिका विक्रीच्या संगणकीय सोडत प्रक्रियेमध्ये सहभाग घेण्याकरिता नागरिकांच्या सोयीकरिता मुदतवाढ देण्यात आली.

इच्छुक अर्जदारांना ऑनलाईन अर्ज सादर करण्यासाठी व अनामत रकमेचा भरणा करण्यासाठी १० जुलैपर्यंत मुदतवाढ देण्यात आली आहे. मुंबई मंडळातर्फे सुधारित वेळापत्रकानुसार, इच्छुक अर्जदार १० जुलै रोजी सायंकाळी ०६ वाजेपर्यंत ऑनलाईन अर्ज सादर करू शकतील तर रात्री ११.५९ वाजेपर्यंत अनामत रक्कमेचा ऑनलाइन भरणा करू शकतील.

तसेच, १२ जुलै रोजी संबंधित बँकेच्या कार्यालयीन वेळेपर्यंत आरटीजीएस आणि आरटीएफद्वारे अनामत रकमेचा भरणा अर्जदारांना करता येणार आहे. १७ जुलै रोजी दुपारी ३ वाजता सोडतीसाठी प्राप्त अर्जांची प्रारूप यादी म्हाडाच्या संकेतस्थळावर प्रसिद्ध केली जाणार आहे. १९ जुलै रोजी दुपारी ३ वाजेपर्यंत प्रारूप यादी प्रसिद्ध झाल्यापासून ऑनलाईन दावे-हरकती दाखल करता येणार आहेत.

२४ जुलै रोजी दुपारी तीन वाजता सोडतीसाठी स्विकृत अर्जांची अंतिम यादी म्हाडाच्या संकेतस्थळावर प्रसिद्ध केली जाणार आहे. सदनिकांच्या वितरणाकरिता प्राप्त अर्जांची संगणकीय सोडत वांद्रे पश्चिम येथील रंगशारदा नाट्यगृहात काढण्यात येणार असून सोडतीचा दिनांक व वेळ नंतर जाहीर करण्यात येणार आहे.