मुंबई : पश्चिम रेल्वेच्या मालाड स्थानकातील सिग्नल यंत्रणे झालेल्या तांत्रिक बिघाडामुळे पश्चिम रेल्वेच्या वाहतुकीचे तीन-तेरा वाजले. त्यामुळे संध्याकाळी पाच वाजेपर्यत तब्बल ९० लोकल फेऱ्या रद्द करण्याची नामुष्की पश्चिम रेल्वेवर आली आहे. या बिघाडामुळे तब्बल २२० लोकलला लेटमार्क लागला. त्यामुळे भर उन्हाळयात पश्चिम रेल्वेच्या प्रवाशांना दिवसभर लोकल गर्दीचा सामना करावा लागत आहे.

पश्चिम रेल्वेने दिलेल्या माहितीनुसार, आज बुधवारी (ता.१३) सकाळी ११.४५ वाजण्याच्या सुमारास मालाड स्थानकातील सिग्नल यंत्रणेच्या केबलमध्ये तांत्रिक बिघाड झाला. त्यामुळे सिग्नल यंत्रणा पुर्णपणे ठप्प पडली होती.त्यामुळे चर्चगेट ते विरार दरम्यानची लोकल वाहतुक पुर्णपणे ठप्प झाली.

परिणामी लोकलच्या एका मागोमाग एक रांगा लागल्याने गाड्या खोळंबल्या होत्या. त्यामुळे लोकल गाड्यामध्ये प्रवासी अडकून पडले होते. या घटनेची माहितीने मिळताच पश्चिम रेल्वेचे अभियांत्रिकी पथक घटना स्थळी दाखल झाले. सुमारे ५०० मीटर अंतरावरील एकुण ८ केबल बदलल्या.

याकरिता रेल्वेचे ४० अधिकारी,कर्मचारी कार्यरत होते.अखेर दुपारी साडे चार वाजण्याच्या सुमारास डाउन मार्गावरील वाहतुक सुरु करण्यात रेल्वेला यश आले. मात्र, प्रवाशांना बराच वेळ नेमका बिघाड काय झाला आहे, हे कळत नव्हते. त्यातच उद्घघोषणा होत नसल्याने प्रवासी त्रासले होते. लोकलमध्ये अडकलेल्या काही प्रवाशांनी खाली उतरुन रुळामधून चालत जाऊन जवळचे बसस्थानक गाठत असल्याचे चित्र दिसून आले आहे.

प्रवासी हैराण

पश्चिन रेल्वेने या सिग्नल बिघाडानंतर डाउन धिम्या मार्गावरील वाहतुक सुरु ठेवली होती. मात्र सिग्नल यंत्रणेच्या बिघाडामुळे अप-डाउन धिमी आणि जलद चारही मार्गावरील लोकलची वाहतुक विस्कळित झाली होती. हा गोधळ दिवसभर सुरु असल्याने पश्चिम रेल्वे मार्गावर धावणाऱ्या ९० लोकल फेऱ्या रद्द कराव्या लागल्या होत्या. तर २२० पेक्षा जास्त लोकल उशिराने धावत होत्या. त्यानंतर संध्याकाळी सहा वाजता सर्व मार्गावरील लोकल वाहतुक पुर्वपदावर आली.

रेल्वे वाहतुकीचे तीन तेरा

मालाड स्थानकातील सिग्नल बिघाडामुळे रेल्वे वाहतुकीचे तीन तेरा वाजले होते. अनेक लोकल सेवा एका मागे एक उभ्या असल्याने लोकल गाड्याच्या वेळापत्रकावर मोठा परिणाम पडला होता. लोकल सेवांचा नियमित वेळापत्रकापेक्षा सुमारे एक ते दीड तास उशिराने धावत होत्या. परिणामी संद्याकाळी घरी जाण्यासाठी निघालेल्या प्रवाशांना गर्दीचा सामना करावा लागला. दादर,अंधेरी, वांद्रे,गोरेगांव, मुंबई सेंट्रल आणि चर्चगेट स्थानकांवर प्रवाशांची प्रचंड गर्दी उसळली होती.