मुंबई - मुंबईतील छत्रपती शिवाजी महाराज आंतरराष्ट्रीय विमानतळावरील स्वच्छतागृहात इसिसकडून धमकीचे पत्र आढळल्यामुळे खळबळ उडाली आहे. इस्लामिक स्टेट ऑफ इराक अँड सीरियाकडून (इसिस) नववर्षात प्रजासत्ताकदिनी विमानतळावर हल्ला घडवून आणणार असल्याची धमकी पत्रात होती.

विमानतळाच्या इमारतीतील स्वच्छतागृहात बुधवारी सायंकाळी 5च्या सुमारास एका कर्मचाऱ्याला पत्र सापडले. त्याने ही माहिती सुरक्षा अधिकाऱ्यांना दिली. त्यानंतर विमानतळाच्या सुरक्षेत वाढ करण्यात आली. "सीआयएसएफ'चे जवान, पोलिस आणि बॉंबशोधक-नाशक पथकाने प्रतिबंधात्मक उपाय म्हणून कार्गो टर्मिनल तत्काळ रिकामे केले आणि परिसरात शोधमोहीम राबविली. त्यात कोणतीही आक्षेपार्ह गोष्ट सापडली नसल्याचे पोलिसांनी स्पष्ट केले.

या घटनेनंतर प्रवाशांबरोबरच कामगारांची कडक तपासणी करण्यात आली. त्यानंतर त्यांना विमानतळावर सोडण्यात आले. या घटनेचा विमानाच्या उड्डाणांवर कोणताही परिणाम झालेला नाही; मात्र सुरक्षेचा उपाय म्हणून तत्काळ कार्गो टर्मिनल रिकामे करण्यात आल्याची माहिती विमानतळाच्या जनसंपर्क अधिकाऱ्यांनी दिली.