मुंबई - दिवाळीच्या आधी सोमवारी (ता.16) मुंबई विद्यापीठाने 163 कंत्राटी कामगारांना पुन्हा कामावर घेतले. जून महिन्यात कंत्राट संपल्यानंतर विद्यापीठाने तब्बल 470 कंत्राटी कामगारांना कामावरून कमी केले होते. 

तृतीय आणि चतुर्थ श्रेणीतील या कामगारांना विद्यापीठाने कालपासून रुजू करून घेतल्याने कामगारांमध्ये आनंदाचे वातावरण आहे. कंत्राटी कामगारांना काढल्याने काही महिन्यांपासून विद्यापीठातील कामकाजावरही परिणाम झाला होता. निकालांच्या गोंधळात मनुष्यबळ कमी पडले होते. तीन महिन्यांपासून विद्यापीठातील इतर कामकाजावरही याचा परिणाम दिसत होता. त्यामुळे कंत्राटी कामगारांना परत घेण्याबाबत व्यवस्थापकीय परिषदेच्या बैठकीत चर्चा झाली होती. त्यावर सकारात्मक निर्णय झाल्यानंतर टप्प्याटप्प्याने उर्वरित कंत्राटी कामगारांनाही कामावर घेतले जाईल, अशी माहिती सूत्रांनी दिली.