मुंबई - शिवसेनाप्रमुख बाळासाहेब ठाकरे यांच्या स्मारकासाठी महापौर निवासाची जागा देण्यात येणार असून, विकास आराखड्यातील "महापौर बंगला' यासाठी आरक्षित असलेल्या भूभागाच्या आरक्षणात बदल करण्याच्या प्रस्तावाला मंगळवारी सुधार समितीने मंजुरी दिली.

महापौर बंगल्याच्या जागेचे आरक्षण बदलून "स्वर्गीय बाळासाहेब ठाकरे यांचे भव्य स्मारक' यासाठी आरक्षण करणे, तसेच हा भूखंड हरित क्षेत्रातून वगळून रहिवासी क्षेत्रात समाविष्ट करण्यास परवानगी देण्यात आली. हा भूखंड सीआरझेडमध्ये येत असल्याने केंद्राच्या पर्यावरण, वन आणि वातावरणीय बदल विभागाची परवानगी घेण्यात येणार आहे. स्मारकाच्या मार्गातील अडथळे दूर झाले आहेत. स्थायी समिती, तसेच पालिकेच्या सभागृहात या प्रस्तावाला मंजुरी मिळेल, अशी माहिती सुधार समितीचे अध्यक्ष अनंत नर यांनी दिली.