मुंबई - मुंबईत पावसाने पडझडीचे सत्र सुरु असून आज सकाळी ७.२६ वाजता मालाड पश्चिम मामलेदार वाडी येथे पादचाऱ्याच्या अंगावर झाड कोसळले. या दुर्घटनेत कौशल दोशी ( ३८) यांचा मृत्यू झाल्याचे पालिकेच्या आपत्कालीन व्यवस्थापन नियंत्रण कक्षाकडून सांगण्यात आले. गेल्या २४ तासांत मुंबई शहर व दोन्ही उपनगरात एकूण २६ ठिकाणी झाड व झाडांच्या फांद्या कोसळण्याच्या घटना घडल्या आहेत.

मालाड पश्चिम मामलेदार वाडी जंक्शन येथून जाणाऱ्या कौशल दोशी यांच्या अंगावर झाड कोसळले. या दुर्घटनेत ते जखमी झाले असता कांदिवली येथील शताब्दी रुग्णालयात उपचारासाठी दाखल करण्यात आले. मात्र रुग्णालयात दाखल करण्यापूर्वी त्यांचा मृत्यू झाल्याचे रुग्णालयाचे डॉ. विनय यांनी सांगितले. दरम्यान, स्थानिक पोलीस व मुंबई महापालिकेचे विभागीय अधिकारी पुढील तपास करीत आहेत.‌

२६ ठिकाणी झाडे कोसळली

मुंबईत सुरु असलेल्या पावसामुळे गेल्या २४ तासांत २६ ठिकाणी झाडे व झाडांच्या फांद्या कोसळल्या. यात शहरात ४, पूर्व उपनगरात ८, पश्चिम उपनगरात १४ अशा एकूण २६ ठिकाणी झाडे, फांद्या कोसळण्याच्या घटनांची नोंद झाली आहे.

१५ ठिकाणी शाॅर्ट सर्किट

गेल्या २४ तासांत १५ ठिकाणी शाॅर्ट सर्किटच्या घटना घडल्या असून यात शहरात ४, पूर्व उपनगरात ४ व पश्चिम उपनगरात ७ अशा एकूण १५ ठिकाणी शॉर्टसर्किट होण्याच्या घटना घडल्या.

पडझड

गेल्या २४ तासांत शहरात १, पूर्व उपनगरात ३ व पश्चिम उपनगरात १ अशा एकूण ०५ ठिकाणी घराचा काही भाग पडल्याच्या घटना घडल्या आहेत.