कोरोना काळात अत्यावशक सेवा देणाऱ्या सर्व कर्मचाऱ्यांनी मोठ्या जिकरीनं आपलं कर्तव्य पार पाडलं. अत्यावश्यक सेवेतील या सर्व कर्मचाऱ्यांना सरकारकडून दिवाळीनिमीत्त भेट देण्यात आली. यामध्ये सरकारने या सर्व कर्मचाऱ्यांना आर्थिक स्वरुपात बक्षीस दिलं. मात्र ही दिवाळी भेट देताना सरकारने मुंबई पोलिसांची मात्र चेष्ठा केल्याचं पहायला मिळतं आहे.

कोरोना काळात दिवस रात्र नागरिकांच्या सेवेसाठी रस्त्यावर उतरून कायदा व सुवस्थेचं काम करणाऱ्या मुंबई पोलिसांना सरकारने दिवाळी निमीत्त चक्क ७५० रुपये दिल्यानं या कर्मचाऱ्यांची निव्वळ चेष्टा केल्याचं दिसतं आहे. सरकारने दिलेल्या ७५० रुपयांमुळे पोलिसांमध्ये नाराजीचं वातावरणं आहे. मुंबई पोलिसांना दिवाळी भेट म्हणून सबसिडी कँटिनमधून त्यांच्या प्रत्येक कर्मचाऱ्यांच्या डेबिट व क्रेडिट कार्डवर ७५० रुपये रकमेची खरेदी विनामुल्य करता येणार आहे.

पोलीस कल्याण निधीतून सर्व पोलिसांना ही भेट दिले जाणार आहे. मात्र त्यावरील पैसे त्यांना खिशातून द्यावे लागणार असल्याचं पत्र पोलिस आयुक्त हेमंत नगराळे यांच्या नावे काढण्यात आले आहे. एकीकडे पालिका, बेस्ट कर्मचारी आणि इतर शासकिय कर्मचार्यांना भरगोस दिवाळी बोनस दिला जात असताना पोलिसांना मात्र ७५० रुपये दिवाळी भेट देऊन त्यांची चेष्ठा केल्याची चर्चा पोलिस दलात आहे.