मुंबई - मुंबई पोलिसांनी शुक्रवारी 28 ऑक्टोबरला मुंबईतील जे घरमालक आपली जागा भाड्याने देऊ इच्छित आहेत अशा घर मालकांसाठी एक सूचना जारी केली आहे. मुंबईचे पोलिस उपायुक्त संजय लाटकर यांनी परिपत्रकाद्वारे हा आदेश जारी केला आहे. हा आदेश 6 नोव्हेंबर 2022 पासून अंमलात येईल. या आदेशाचे उल्लंघन करणारी कोणतीही व्यक्ती भारतीय दंड संहिता, 1860 च्या कलम 188 अंतर्गत दंडनीय असेल.

मुंबई पोलीस आयुक्तालयाच्या अखत्यारीत येणाऱ्या कोणत्याही घरमालकाला आपल्या घरात भाडोत्री ठेवण्यापूर्वी घरमालकाने तत्काळ घर भाड्याने घेणाऱ्या व्यक्तींचा तपशील पोलिसांना सादर करावा. मुंबई पोलिसांच्या ऑनलाईन पोर्टलवर जाऊन तपशील देता येईल. आदेशात पुढे म्हटले आहे की, भाड्याने घर दिलेली व्यक्ती परदेशी असेल, तर घरमालकाने परदेशी व्यक्तीचे नाव, राष्ट्रीयत्व, पासपोर्ट तपशील जसे की पासपोर्ट क्रमांक, ठिकाण, जारी करण्याची तारीख आणि वैधता सादर करावी. व्हिसा तपशील उदा व्हिसा क्रमांक, श्रेणी, ठिकाण आणि जारी करण्याची तारीख, वैधता, नोंदणी ठिकाण आणि शहरात राहण्याचे कारण याची माहिती सुद्धा पोलिसांना द्यावी.मुंबई पोलीसानी सुरक्षेच्या दृष्टीने हे पाऊल उचलल्याचे सांगण्यात येत आहे.