मुंबई - मुंबई पोलिसांच्या अंमली पदार्थ विभागाने आज एक मोठी कारवाई केली आहे. मुंबईतील घाटकोपर युनिटने ३८ किलोचा गांजा जप्त केला आहे. मुंबई पोलिसांनी नुकतीच या घटनेची माहिती दिली आहे. आंतरराष्ट्रीय बाजारात या गांजाची किंमत ८ लाख रुपये इतकी असल्याचे पोलिसांना सांगितले आहे. याप्रकरणी दोन व्यक्तींवर गुन्हा दाखल झाला असून पुढील तपास पोलिस करत आहेत.

घडलेली घटना अशी, घाटकोपरच्या वैतागवाडी येथील पीडब्ल्यूडी सिमेंट गोडाऊन येथून हे दोन्ही आरोपी गांजाच्या गोणी घेऊन जात होते. त्यांच्या संशयित हालचाली पाहून पोलिसांनी त्यांना हटकले चौकशी आणि अंग झडतीत त्याच्याजवळ हे अंमली पदार्थ आढळून आले. दुसरीकडे अंमली पदार्थ विभागाच्या आझाद मैदान युनिटने ५ लाख ७० हजाराचे एमडी ड्रग्जची तस्करी करणाऱ्या आरोपीला बेड्या ठोकल्या आहेत. आयुब खान असे या आरोपीचे नाव असून तो मूळचा धारावीचा राहणारा आहे. आयुबवर तो राहत असलेल्या शाहू नगर पोलिसांच्या हद्दीत मारामारी व इतर गुन्ह्यांत सहभागी असल्याचेही गुन्हे नोंद आहेत. या प्रकरणी अंमली पदार्थ विभागाचे पोलिस अधिक तपास करत आहेत.