Mumbai Pollution: मुंबईतील २२ हजार किलोमीटर रस्ते आतापार्यंत धुतले आहेत. त्यामुळे प्रदूषण पातळी घटली असून वातावरणाचा स्तर सुधारण्यास मदत झाली, असा दावा आयुक्त इक्बालसिंह चहल यांनी केला. महास्वच्छता अभियानाच्या उद्‍घाटन समारंभाप्रसंगी ते बोलत होते.

कार्यक्रमाचे प्रास्ताविक करताना चहल म्हणाले, की मुख्यमंत्री एकनाथ शिंदे यांच्या संकल्पनेतून ३ डिसेंबरपासून सुरू झालेल्या स्वच्छता मोहिमेअंतर्गत आतापर्यंत संपूर्ण मुंबईत मिळून सुमारे २२ हजार किलोमीटर लांबीचे रस्ते धुण्यात आले आहेत. आजवर १३ विभागांत संपूर्ण स्वच्छता करण्यात आली आहे. त्यातून १८३ टन कचरा आणि १,१०० टन राडारोडा उचलण्यात आला आहे.

दररोज एक हजार किलोमीटर रस्ते धुण्याचा संकल्प हाती घेण्यात आला आहे. त्याचा परिणाम म्हणून हवा गुणवत्ता निर्देशांक ३५० वरून निम्म्यावर आला आहे. काही ठिकाणी तर तो ९० च्याही खाली आला आहे. आजच्या कार्यक्रमाच्या निमित्ताने अभियानाला नवचेतना मिळाली असून त्याचे जनचळवळीत परावर्तन झाले आहे. मुंबई मॉडेल देशासाठी निश्चितच मार्गदर्शक ठरेल, असा आशावादही चहल यांनी व्यक्त केला.