Mumbai Pune Express Way: मुंबई- पुणे एक्स्प्रेस वेच्या मुंबई वाहिनीवर हायवे ट्रॅफिक मॅनेजमेंट सिस्टम अंतर्गत वाहनांवर वॉच ठेवण्याकरिता सर्व्हिलन्स कॅमेरे बसवण्यात येणार आहेत. त्यासाठी आवश्यक असलेली गॅन्ट्री बसवण्यासाठी उद्या मंगळवारी दुपारी १२ ते २ या वेळेत मुंबई वाहिनीवरील सर्व प्रकारची वाहतूक बंद ठेवण्यात येणार आहे. या बदलाची दखल घेत वाहनधारकांनी आपल्या प्रवासाचे नियोजन करावे असे आवाहन महाराष्ट्र राज्य रस्ते विकास महामंडळाने केले आहे.

मुंबई- पुणे एक्सप्रेस वेवरून दररोज लाखो वाहने ये- जा करतात. अनेक वाहन चालक वेग मर्यादेचे उल्लंघन करत असल्याने जीवघेणे अपघात घडतात. त्याला चाप लावण्यासाठी एमएसआरडीसी ठिकठिकाणी गॅन्ट्री उभारून त्यावर सर्व्हिलन्स कॅमेरे बसवणार आहे. त्याचाच भाग म्हणून एक्स्प्रेस वेच्या मुंबई वाहिनीवर १५.७५० किमी येथे गॅन्ट्री बसवण्यासाठी मंगळवारी दोन तसाच ब्लॉक घेण्यात येणार आहे. त्यामुळे पुण्याहून- मुंबईच्या दिशेने येणारी वाहतूक दोन तास बंद राहणार आहे. दरम्यान वाहनधारकांना ब्लॉक कालावधीत पर्यायी मार्गाने प्रवास करता येणार आहे.

- द्रुतगती मार्गावरुन पुणे ते मुंबई वाहिनीवरील (पुण्याहुन मुंबईकडे येणारी) हलकी वाहने मुंबई वाहिनीवर लेन किमी ५५ वरुन वळवुन मुंबई- पुणे राष्ट्रीय महामार्ग क्र. ४८ या जुना पुणे- मुंबई मार्गावरुन मार्गस्थ होतील.

- पुणे ते मुंबई वाहिनीवरील मुंबईकडे येणारी हलकी वाहने व बसेस खोपोली एक्झिट किमी ३९ येथुन वळवून राष्ट्रीय महामार्ग क्र. ४८ या जुन्या पुणे- मुंबई महामार्गावरुन खोपोली शहरातून पुढे शेंडूग टोल नाका मार्गे मुंबई वाहिनीवरुन मार्गस्थ होणार आहेत.