Mumbai Rain News :

अरबी समुद्रातील कमी दाबाच्या पट्ट्याचा मुंबईवर कोणताही परिणाम जाणवला नाही. दक्षिण कोकण आणि मध्य व पश्चिम महाराष्ट्रात याचा परिणाम जाणवत असून पावसाचा जोर वाढला आहे.

मुंबईत मात्र स्थिती साधारण राहण्याची शक्यता असून कोणताही अलर्ट नसल्याचे मुंबई प्रादेशिक हवामान विभागातील ज्येष्ठ शास्त्रज्ञ सुषमा नायर यांनी सांगितले.

सध्या परतीच्या पावसाची सुरुवात झाली आहे. राज्यातील काही भागांत त्याचा परिणाम जाणवत आहे. काही भागांत हलका, मुसळधार; तर काही ठिकाणी अतिमुसळधार पाऊस सुरू आहे. मुंबईतही काही ठिकाणी तुरळक पावसाच्या सरी कोसळल्या.

परतीच्या पावसाचा परिणाम १० ऑक्टोबरपर्यंत राहील. शहर आणि उपनगरात हलका ते मध्यम पाऊस किंवा मेघगर्जनेसह अंशतः ढगाळ आकाश राहील. कमाल आणि किमान तापमान अनुक्रमे २९ आणि २४ अंश नोंदवण्यात आले. पुढील २४ तासांत तापमान अनुक्रमे ३२ अंश सेल्सिअस आणि २४ अंश सेल्सिअस राहण्याची शक्यता आहे.