Mumbai Rain Withdraw: मुंबईत परतीच्या पावसानं कहर केला असून मध्य रेल्वेच्या ट्रॅकवर मोठ्या प्रमाणावर पाणी साचल्यानं रेल्वे सेवा ठप्प झाली आहे. त्यामुळं मुंबईकरांचा मोठा खोळंबा झाला आहे. तसंच डोंबिवलीत वीज कोसळून दोघांचा मृत्यू झाला आहे. तर मुंब्रा बायपासवर दरड कोसळल्यानं रस्ता वाहतूक ठप्प झाली आहे.

कल्याण तालुक्यातील कांबा परिसरात दगडाच्या खाणीत काम करताना दोन कामागरांचा मृत्यू झाल्याची घटना बुधवारी घडली. वीज पडून या कामगारांचा मृत्यू झाल्याची प्राथमिक माहिती टिटवाळा पोलिसांनी दिली आहे. राजन यादव (वय 22) आणि बंदणा मुंडा (वय 25) अशी मृत कामगारांची नावं आहेत. याचा अधिक तपास टिटवाळा पोलिस करीत आहेत.

तर मुंब्रा बायपासजवळ बुधवारी रात्री साडे आठच्या सुमारास मुंब्रा परिसरात मुसळधार पाऊस सुरू असताना डोंगराच्या कडेला असणाऱ्या खडीमशीन जवळील सैनिकनगर इथं रस्त्यावर दरड कोसळली. यामध्ये दगड माती खाली आल्यानं काहीकाळ वाहतूक संथ गतीनं सुरू होती. दरडीचा भाग कोसळताच मुंब्रा प्रभाग समिती आपत्ती व्यवस्थापन कक्षाच्या कर्मचाऱ्यांनी व मुंब्रा वाहतूक पोलिसांनी घटनास्थळी धाव घेतली.

यावेळी दिवा येथून तातडीनं जेसिबी मशीन मागवून रस्त्यावरील दगड बाजूला करण्यात आले. आपत्ती व्यवस्थापन कक्षाच्या कर्मचाऱ्यांनी तातडीनं दगड बाजूला करून वाहतूक पोलिसांच्या मदतीनं मलबा व दगड बाजूला केल्याची माहिती मुंब्रा प्रभाग समितीचे सहाय्यक आयुक्त बाळू पिचड यांनी दिली.