मुंबई - आयसीआयसीआय बँकेसह काही बड्या अर्थसंस्थांचे निकाल चांगले आल्यामुळे आज शेअरबाजारात उत्साह संचारला व सेन्सेक्सने पुन्हा साठ हजारांना गवसणी घातली. आज सेन्सेक्स ४०१.०४ अंश तर निफ्टी ११९.३५ अंश वाढला.

आज दुपारपर्यंत सेन्सेक्स साठ हजारांच्या खालीच होता, त्यानंतर जोरदार खरेदी सुरु झाली व सेन्सेक्स साठ हजारांच्या वर गेला. दिवसअखेर सेन्सेक्स ६०,०५६.१० अंशांवर तर निफ्टी १७,७४३.४० अंशांवर स्थिरावला.

आज बँका-अर्थसंस्था तसेच बांधकाम व्यवसाय कंपन्यांचे शेअर तेजीत होते, तर औषधनिर्मिती आणि वाहननिर्मिती कंपन्यांच्या शेअरचे भाव घसरले.

मागील आठवड्यात आयटी शेअरच्या अपेक्षेपेक्षा कमी कामगिरीमुळे बाजारात आलेले निराशेचे वातावरण अर्थसंस्थांच्या चांगल्या निकालांमुळे दूर झालेच, पण आयटी व बँकांच्या शेअरमध्ये तळाच्या भावाला खरेदीही झाली. आज निफ्टीमधील मुख्य ३६ शेअरचे तर सेन्सेक्सच्या प्रमुख २७ शेअरचे भाव वाढले.

आज सेन्सेक्समधील विप्रो, टायटन, आयसीआयसीआय बँक, अॅक्सीस बँक, स्टेटबँक या शेअरचे भाव दोन टक्के वाढले.

तर अल्ट्राटेक सिमेंट, एचडीएफसी, नेस्ले, एचडीएफसी बँक, टाटा मोटर्स या शेअरचे भाव एक टक्क्याच्या आसपास वाढले. दुसरीकडे इंडसइंड बँक, मारुती, सनफार्मा, एअरटेल या शेअरच्या भावात घसरण झाली.

तळाच्या भावाला शेअरबाजारांमध्ये चांगली खरेदी होत आहे, यापुढेही शेअरबाजार विशिष्ठ टप्प्यातच फिरत राहील, मात्र बाजाराचा कल वाढण्याच्याच अपेक्षेत आहे. मोठ्या कंपन्यांच्या निकालांकडे तसेच अमेरिका, जर्मनी, फ्रान्स यांच्या जीडीपी तपशीलाकडे तसेच बँक ऑफ जपानच्या व्याजदराच्या निर्णयाकडे सर्वांचे लक्ष राहील. - सिद्धार्थ खेमका, मोतीलाल ओसवाल फायनान्शिअल सर्व्हिसेस.

रुपया १५ पैसे वाढला

शेअरबाजारात झालेली वाढ आणि कमी होत चाललेले कच्च्या तेलाचे दर यामुळे आज रुपयाचा भाव अमेरिकी डॉलरच्या तुलनेत १५ पैसे वाढून तो ८१.९१ वर स्थिरावला. आज रुपयाचे व्यवहार ८२.०८ वर सुरु झाले, दिवसभरात तो ८१.८८ पर्यंत वाढला तर ८२.०९ पर्यंत घसरला होता. शुक्रवारी रुपया ८२.०६ वर बंद झाला होता.