Mumbai Toll News : महाराष्ट्र राज्य रस्ते विकास महामंडळ (एमएसआरडीसी) अंतर्गत मुंबईतील प्रवेशद्वारावरील टोलच्या दरांमध्ये वाढ केली जाणार आहे. त्यानुसार येत्या १ ऑक्टोबरपासून कारसाठी पाच रुपये तर मिनीबस १० रुपये, ट्रक आणि बससाठी २० रुपये अतिरिक्त आकारले जाणार आहेत. सार्वजनिक बांधकाम विभागाच्या २७ सप्टेंबर २००२ च्या अधिसूचनेत दर तीन वर्षांनी टोल दरवाढीसंदर्भात उल्लेख केलेला आहे. त्यानुसार ही टोल दरवाढ केली जाणार आहे.

मुंबईचे प्रवेशद्वार असलेल्या मुलुंड-ऐरोली, पश्चिम द्रुतगती मार्गावर दहिसर, पूर्व द्रुतगती मार्गावर मुलुंड, मुलुंड-ठाणे मार्गावरील लाल बहाद्दूर शास्त्री, वाशी येथे सायन-पनवेल महामार्गावरील टोल नाक्यावर टोल दरवाढ लागू होणार. टोल चालकांना वसुलीचे कंत्राट दिले तेव्हाच दर तीन वर्षांनी दरवाढ करण्याची अधिसूचना जारी झाली आहे. त्यानुसार १ ऑक्टोबरपासून मुंबईच्या प्रवेशद्वारांवरील टोल दरवाढ केली जात आहे. १ ऑक्टोबर २०२६ रोजीही याच पद्धतीने टोल दरवाढ केली जाणार असून, २०२७ पर्यंत ही दरवाढ लागू राहणार आहे.

यापूर्वीचे टोल दर

मुंबईच्या प्रवेशद्वारांवर २००२ पासून टोलवसुली सुरू असून, सुमारे २५ वर्षे ही वसुली केली जाणार आहे. २००२ मध्ये कारसाठी २० रुपये, मिनीबस २५, ट्रक/बस ४५, अवजड वाहनांसाठी ५५ रुपये टोल होता; तर २०२३ पर्यंत हेच टोलदर कारसाठी ४०, मिनीबस ६५, ट्रक/बस १३०; तर अवजड वाहनांसाठी १६० रुपये टोल वसूल केला जात आहे.