Mumbai University Election:मागील वर्षभरापासून रखडलेल्या मुंबई विद्यापीठाच्या पदवीधर (सिनेट) सदस्यांच्या निवडणुकीचा कार्यक्रम आणि त्याची अधिसूचना आज मुंबई विद्यापीठाने जाहीर केली आहे. या निवडणुकीसाठी 10 सप्टेंबर रोजी मतदान आणि 13 सप्टेंबर रोजी मतमोजणी होणार आहे.

मुंबई विद्यापीठाच्या पदवीधर सिनेट सदस्याच्या दहा जागासाठी हे मतदान होणार आहे. यामध्ये पाच खुल्या प्रवर्गातील आणि पाच राखीव जागांचा समावेश आहे. राखीव जागांमध्ये एक अनुसूचित जाती आणि एक विमुक्त जाती व भटक्या जमाती तर तीन जागा महिलांसाठी राखीव आहेत.

पदवीधर सिनेट सदस्याच्या या दहा जागांच्या उमेदवारीसाठी 18 ऑगस्ट रोजी सायंकाळी 5 वाजेपर्यंत उमेदवारी अर्ज दाखल करता येईल. तर अर्ज दाखल केलेल्या उमेदवारांच्या अर्जाची छाननी 21 ऑगस्ट रोजी सकाळी 11 वाजता होईल. अर्ज केलेल्या उमेदवारांच्या अर्जांच्या वैधतेसह इतर काही तक्रारी असल्यास त्या संदर्भातील अपील 23 ऑगस्ट रोजी कुलगुरूंकडे करता येईल.

तर 25 ऑगस्ट रोजी सायंकाळी 5 वाजेपर्यंत अर्ज मागे घेता येईल. त्यानंतर 10 सप्टेंबर रोजी सकाळी 9 ते सायंकाळी 5 या वेळामध्ये मतदान होणार असून मतमोजणी ही 13 सप्टेंबर रोजी सकाळी 9 वाजता सुरू होईल, अशी माहिती आज विद्यापीठाकडून देण्यात आले.

मागील पदवीधर सिनेटच्या सर्व दहा जागांवर युवासेनेचे वर्चस्व राहिले होते. यावेळी युवा सेनेने जोरदार तयारी केली असली, तरी यावेळी त्यांच्या विरोधात मैदानात मनविसे, अभाविप, छात्र भारती आदी विद्यार्थी संघटना उतरणार आहेत. त्यांनीही मतदार नोंदणीसाठी मोठी तयारी केली होती. त्यामुळे युवा सेनेला ही पदवीधर सिनेट निवडणूक मोठ्या आव्हानांची असणार आहे.