मुंबई ता. 7 : मुंबई विद्यापीठाच्या दूर आणि मुक्त अध्ययन संस्थेच्या (आयडॉल) तांत्रिक अडचणींमुळे न होऊ शकलेल्या व पुढील सर्व परीक्षा पुढे ढकलण्यात आल्या आहेत. या परीक्षा 19 ॲाक्टोबरपासून सूरू होणार असून परीक्षांचे सुधारीत वेळापत्रक विद्यापीठाच्या संकेतस्थळावर उपलब्ध करून देण्यात येणार असल्याचे परीक्षा आणि मुल्यमापन मंडळाचे संचालक डॅा. विनोद पाटील यांनी सांगितले.

दूर व मुक्त अध्ययन संस्थेच्या अंतिम वर्षाच्या तृतीय वर्ष बीकॉम व बीएच्या परीक्षेस 3 ऑक्टोबर पासून  सुरुवात झाली. परंतु ऑनलाईन परीक्षेच्या सर्व्हरवर सायबर अटॅक झाल्याचा प्रकार समोर येताच विद्यापीठाने मंगळवार (ता.6) व बुधवार (ता.7) ऑक्टोबरला होणारे परीक्षेचे पेपर पुढे ढकलले होते.

महत्त्वाची बातमी : लोकल रेल्वे गाड्यांची संख्या वाढवावी, मुंबई उच्च न्यायालयाची सरकारला सूचना

यानंतर होणाऱ्या परीक्षा सुरळीत व्हाव्यात यासाठी विद्यापीठाने बुधवारी बोलावलेल्या परीक्षा मंडळाच्या बैठकीत आयडॉलच्या परीक्षा पुढे ढकलण्याचा निर्णय घेतला आहे. सुधारीत वेळापत्रकानुसार परीक्षा घेतांना संभाव्य तांत्रिक अडचणी उद्भवणार नाही तसेच यासाठी पर्यायी व्यवस्थाही तयार केली जाणार असून विद्यार्थ्यांनी कोणतीही काळजी  करू नये असेही संचालक डॅा. विनोद पाटील यांनी सांगितले.

परिक्षेच्या पहिल्या दिवसापासून विद्यार्थ्यांना परीक्षेची लिंक, लॉगिन आयडी व पासवर्ड मिळत नसल्याचे प्रकार घडत  असल्याने विद्यार्थ्यांनी आयडॉल इमारतीबाहेर गोंधळ घातला होता. विद्यार्थी संघटनांनीही विद्यापीठावर तीव्र टीका केली होती.

( संपादन - सुमित बागुल )

mumbai university idol exams finally postponed after chaos and hacking