मुंबई : खेड, आंबेगाव व शिरूर तालुक्यातील कोरडवाहू गावांना वरदान ठरणाऱ्या कळमोडी प्रकल्पाला गती मिळावी.  तसेच  डिभे धरणातील जुन्नर, आंबेगाव व शिरूर तालुक्यांच्या हक्काचे पाणी बोगद्याद्वारे थेट नगर जिल्ह्यात पळवू पाहणाऱ्या प्रवृत्तीच्या विरोधात शेतकऱ्यांनी आक्रमक पवित्रा घेतला आहे.  सोमवारपासून आझाद मैदानावर एल्गार

आंदोलन सुरू केले. गुरुवारी आषाढी एकादशीनिमित्ताने आझाद मैदानांवर ‘वारकरी टाळ-मृदंग वादन करून विठ्ठलाकडे आपल्या मागणीसाठी सरकराला जाग येऊ दे असे साकडे घातले आहे. 

आंबेगाव तालुक्यातील कळमोडी धरणाचे पाणी सातगाव पठार या भागातील शेतीला मिळावे या मागणीसाठी शेतकऱ्यांनी आझाद मैदानावर उपोषण सुरू केले आहे. शिवसेनेचे जिल्हा परिषदेचे माजी गटनेते देविदास दरेकर यांच्या नेतृत्वाखाली सातगाव पठार भागातील शेतकऱ्यांचा यामध्ये सहभाग आहे. 

शेतकऱ्यांचे सातबारा उताऱ्यावरील पुनर्वसन खात्याचे शिक्के त्वरित काढावेत व डिंभे धरणातून ( बाबू गेनू जलाशय) काढण्यात येणाऱ्या बोगदयाला विरोध असून सदर बोगदा नामंजूर करावा अशी मागणी करण्यात आली आहे. बेमुदत आमरण उपोषणचा चौथा दिवस आहे.

कळमोडीचे पाणी सातगाव पठार भागाला देण्यास टाळाटाळ केल्यास व डिंभे धरणातून बोगद्याद्वारे नगर जिल्ह्यात पाणी पळविण्याचा प्रयत्न झाल्यास आंबेगाव तालुका, खेड तालुका, तसेच शिरूर तालुक्यातील शेतकऱ्यावर अन्याय होणार आहे, असे देविदास दरेकर यांनी सांगितले.