मुंबई : उंदरावर ताव मारण्यासाठी आलेला नाग (cobra) चक्क वॉशिंग मशिनमध्ये (Washing machine) घुसला; परंतु उंदराने (rat jump) त्याच्या तावडीतून सुटका करून मशिन बाहेर उडी मारली. या दरम्यान नाग अडकल्याचे पाहून घरातील सदस्यांची बोबडीच वळाली. ‘रॉ’ या प्राणिप्रेमी संस्थेच्या स्वयंसेवकांनी (raw animal activist) नागाची अखेर सुटका (cobra rescue) केली.

मुलुंड पश्चिम येथील उदय नगरमधील एका घरातील सदस्य वॉशिंग मशिनमधून धुतलेले कपडे काढण्यासाठी गेला होता. त्या वेळी उंदीर पळत वॉशिंग मशिनमध्ये जाताना दिसला. त्याच्या मागे चक्क नागराज मशिनमध्ये घुसला. मशिनमध्ये डोकावून पाहताच त्यांना नाग उंदराला पकडताना दिसला. त्यानंतर उंदराने त्याच्या तावडीतून सुटका केली.

या प्रकारामुळे घाबरगुंडी उडालेल्या त्या व्यक्तीने तातडीने वॉशिंग मशिनचा दरवाजा बंद करून 'रॉ' संस्थेशी संपर्क साधला. ‘रॉ’चे प्राणिप्रेमी स्वयंसेवक ऑम्सी पारा यांनी दीड फूट लांब नागाची सुटका केली. त्यानंतर तपासणी करून त्याला नैसर्गिक अधिवासात सोडण्यात आले, असे 'रॉ’चे संस्थापक पवन शर्मा यांनी सांगितले.