Navi Mumbai: दूकानातील व्यक्तीने ईलेक्ट्रीशियनचा मोबाईल नंबर न दिल्यामुळे झालेल्या किरकोळ वादात एका तरुणाने चक्क तलवार काढून नाचवल्याचा प्रकार समोर आला आहे.

सिवूड्स सेक्टर ५० येथे सोमवारी दुपारच्या सुमारास हा प्रकार घडल्यामुळे सर्वत्र दहशतीचे वातावरण निर्माण झाले होते. या प्रकरणी तलवार घेऊन दहशत माजवणाऱ्या तरुणाविरोधात एनआरआय सागरी पोलिस ठाण्यात गुन्हा दाखल करण्यात आला आहे.

माझ सफीक कुरेशी (वय २२) हा तरूण सिवूड्स सेक्टर ५० येथील ओमायरा सोयाटीत दुपारच्या सुमारास एका दूकानात घुसला. या दुकानात बसलेल्या त्याच्या ओळखीच्या तरुणाकडे कुरेशीने ईलेक्ट्रीशीयनचा मोबाईल क्रमांक मागितला.

परंतु वारंवार मागुन सुद्धा मोबाईल क्रमांक न दिल्यामुळे कुरेशीचा संताप अनावर झाला. मोबाईल नंबर देत नसल्यामुळे कुरेशी थेट तलवार काढत दुकानातील मुलाच्या अंगावर धावून गेला.

हा सर्व प्रकार दुकानात लावलेल्या सीसीटीव्ही कॅमेऱ्यामध्ये कैद झाला. परंतु या प्रकारामुळे सिवूड्स परीसरात भीतीचे वातावरण निर्माण झाले होते. या प्रकरणी एनआरआय सागरी पोलिस ठाण्यात गुन्हा दाखल केला असून तरुणाला ताब्यात घेतले असल्याचे वरिष्ठ पोलिस निरीक्षक प्रमोद तोरडमल यांनी सांगितले.